Avstriyada yeni mövsümün hazırlıqlarını davam etdirən Ağdamın “Qarabağ” klubu təlim-məşq toplanışı çərçivəsində növbəti yoxlama oyunlarına çıxıb. Qurban Qurbanovun yetirmələri günü iki matçla tamamlasalar da, azarkeşlərini sevindirə bilməyiblər. “Köhlən atlar” günü həm böyükhesablı, həm də minimal məğlubiyyətlərlə başa vurub.

Günün ilk qarşılaşmasında “Qarabağ” Ukraynanın “Xarkov” klubu ilə qüvvəsini sınayıb. Kessendəki “Kayzervinkl Arena”da baş tutan matç Ağdam təmsilçisi üçün şokla başlayıb. Müdafiədəki ciddi boşluqlardan maksimum yararlanan rəqib ilk hissədə rəqib qapısına 3 cavabsız qol vurub.

İkinci yarıda “Qarabağ” oyunda dönüş etməyə çalışıb. 47-ci dəqiqədə Cəli Muaddib, 68-ci dəqiqədə isə Kadinin qolları komandaya ümid versə də, müdafiə xəttindəki fərdi səhvlər yekun nəticəyə təsir edib. İkinci hissədə qapısında daha 3 qol görən “skatunlar” meydandan 2:6 hesablı gözlənilməz və böyükhesablı məğlubiyyətlə ayrılıblar.

Günün ikinci və son qarşılaşmasında Qurban Qurbanov meydana tam fərqli bir heyət çıxarıb. Macarıstanın iddialı klublarından olan “Ferentsvaroş”la qarşılaşma daha gərgin və bərabər mübarizə şəraitində keçib. Lakin matçın ilk hissəsində qapısında gördüyü yeganə qola cavab verə bilməyən “Qarabağ”, bu görüşdən də minimal (0:1) məğlubiyyətlə ayrılmalı olub.

Xatırladaq ki, “Qarabağ” Avstriya toplanışı çərçivəsində keçirdiyi bundan əvvəlki ilk yoxlama oyununda yerli “Tirol” klubunu darmadağın etmişdi (4:0). Qurban Qurbanovun bu iki oyunda fərqli heyətləri sınaqdan keçirməsi, komandanın hazırkı fiziki durumunu və yeni transferləri dəyərləndirmək məqsədi daşıyır.