Qəbələ-Xankəndi III Beynəlxalq Ultramarafonu başa çatıb. Dörd gün davam edən yarışda 6 ölkədən 97 atlet iştirak edib.
Yarışın sonuncu mərhələsində iştirakçılar Ağdamdan Xankəndiyə qədər 29,2 kilometr məsafə qət ediblər. Bu mərhələdə finiş xəttini ilk keçən Gürcüstan təmsilçisi David Xarazişvili olub. Qadınların mübarizəsində isə ukraynalı Olena Şevçenko birinci yeri tutub.
Gənclər və İdman Nazirliyi, Azərbaycan Atletika Federasiyası və Bakı Şəhər Halqası Əməliyyat Şirkətinin birgə təşkilatçılığı ilə keçirilən ultramarafon dörd mərhələdən ibarət olub. Atletlər Qəbələ–Ağdaş (52,5 km), Ağdaş–Bərdə (63,5 km), Bərdə–Ağdam (46,8 km) və Ağdam–Xankəndi (29,2 km) marşrutları üzrə ümumilikdə 192 kilometr məsafə qət ediblər.
Qeyd edək ki, Xankəndi Ultramarafonu ilk dəfə 2024-cü ildə Xankəndi–Bakı marşrutu üzrə təşkil olunub. Həmin vaxt 380 kilometrlik məsafəni dörd ölkədən 64 atlet qət edib. 2025-ci ildə isə Qəbələ–Xankəndi marşrutu üzrə keçirilən yarışda altı ölkədən 81 atlet iştirak edib.