Ölkəmizin U-20 millisinin sükanı arxasına keçən Ruy Jorje paytaxtda jurnalistlərin suallarını cavablandırıb. Təyinatından məmnunluğunu ifadə edən portuqaliyalı baş məşqçi, qarşıdakı 1 il 7 ay ərzində səmərəli iş ortaya qoyacaqlarına ümid etdiyini bildirib.
Millinin uğur qazanıb-qazanmayacağı ilə bağlı sualı cavablandıran Jorje, əsas yükün futbolçuların üzərinə düşdüyünü vurğulayıb: “Uğur qazanmaq üçün çox çalışmaq lazımdır. Nə mən, nə də başqa bir məşqçi hansısa komandaya əvvəlcədən uğur zəmanəti verə bilməz. Hər şey futbolçulardan və onların istəyindən asılıdır. Onlar yüksək səviyyədə çıxış etmək üçün öz üzərlərində durmadan işləməlidirlər. Əgər biz bunu təmin edə bilsək, uğur da gələcək”.
Yeni baş məşqçi vəzifəyə gəlməzdən əvvəl ölkəmizdə çalışmış tanınmış mütəxəssis Fernandu Santuşla əlaqə saxladığını gizlətməyib: “Müqavilə imzalamazdan əvvəl Santuş və onun köməkçiləri ilə danışdım. Ölkə və insanlar haqqında kifayət qədər məlumat topladım. Buranın qonaqpərvərliyi və insanların münasibəti barədə yalnız müsbət fikirlər eşitmişdim. İlk gündən gördüm ki, Santuş tamamilə haqlı imiş. Futbol məsələsinə gəlincə, o, əsas millidə çalışırdı, mən isə gənclərdən ibarət komandaya rəhbərlik edəcəyəm. İşimiz və tələblərimiz fərqli olduğu üçün yalnız ölkə barədə söhbət etdik”.
Jorje 2013-cü ildə Azərbaycanın gənclər yığmasına qarşı keçirdikləri oyunları (2:0, 3:0) hələ də xatırladığını bildirib: “13 il əvvəlki o qarşılaşmalar dərhal yadıma düşdü. Hətta vurduğumuz ikinci qolu belə xatırlayıram. Həmin matç Bernardo Silvanın Azərbaycan torpağında gerçəkləşən debütü idi. Danışıqlar masasına oturmazdan əvvəl U-19-un oyunlarını da izlədim. İnkişaf ideyalarımı formalaşdırmaq üçün Malta və Polşa ilə matçlara baxmışam”.
Komandanın gələcək oyun üslubu barədə danışan mütəxəssis, hələlik konkret sistem üzərində dayanmadıqlarını qeyd edib: “Çexiya, Şimali İrlandiya və Sloveniya ilə oyunları da analiz etmişəm. Hazırda hansı sistemlə oynayacağımızı deyə bilmərəm, çünki bu barədə hələ qərar verməmişik. İlk növbədə futbolçuların fərdi səviyyəsini qaldırmalıyıq, ondan sonra növbəti tapşırıqlara keçəcəyik”.