Meksika millisinin simvolik qapıçısı Gilyermo Oçoa dünya çempionatı öncəsi komandanın təlim-məşq toplanışına qoşulub. İyunin 11-də start götürəcək mundial təcrübəli qolkiper üçün xüsusi əhəmiyyət kəsb edir. Belə ki, Oçoa karyerasında 6-cı dəfə dünya çempionatının iştirakçısı olmağa hazırlaşır. Maraqlıdır ki, o, indiyə qədər qatıldığı 5 turnirdən yalnız 3-də meydana çıxıb.
ABŞ və Kanada ilə birlikdə mundiala ev sahibliyi edəcək Meksikada hamı əmindir ki, baş məşqçi Xavyer Agirrenin yekun siyahısında 40 yaşlı Oçoanın yeri toxunulmazdır. Hazırda Kiprin AEL-nin şərəfini qoruyan və milli komandada 152 oyun keçirən veteran qapıçı, hələ də ölkənin ən parlaq futbol ulduzlarından biri hesab olunur.
Oçoa sosial şəbəkə hesabında toplanışla bağlı duyğularını bölüşərək, milli formanı geyinməyin onun üçün heç vaxt adiləşmədiyini vurğulayıb: “Unudulmaz gecələr, saysız-hesabsız matçlar, hələ də bədənimi titrədən dövlət himnləri və həyatımı həmişəlik dəyişən anlar yaşamışam. Ruhumda saysız xatirə, bədənimdə isə illərin şramlarını daşıyıram. Amma nə vaxt Meksika “gəl” desə, içimdəki o həyəcanlı uşaq yenidən oyanır. Özümü yenə milli komandada oynamaq xəyalı ilə yaşayan uşaq kimi həyəcanlı hiss edirəm”.
Oçoa bu turnirdə yaşıl meydana ayaq basmaqla futbolun “elitar klubuna” daxil olacaq. Lionel Messi və Kriştiano Ronaldu kimi əfsanələrin rekordunu təkrarlamağa hazırlaşan qolkiper, düz 6 dünya çempionatında (2006, 2010, 2014, 2018, 2022) iştirak edən nadir seçilmişlərdən biri kimi tarixə düşəcək.
Onun dünya çempionatları tarixinə həkk olunan möhtəşəm seyvləri hələ də yaddaşlardadır. Xüsusilə, 2014-cü ildə Braziliya ilə matçdakı ‘canlı sədd’ performansı və 2022-ci ildə Robert Levandovskinin penalti zərbəsini dəf etməsi futbol dünyasının unudulmaz anları sırasındadır.
“Asteklər” turnirə qədər üç müxtəlif qitə təmsilçisi – Qana (22 may), Avstraliya (30 may) və Serbiya (4 iyun) ilə güclərini yoxlayacaqlar. Bu marafonun kulminasiya nöqtəsi isə iyunun 11-də əfsanəvi “Atsieka” arenasında Cənubi Afrika ilə keçiriləcək mundialın rəsmi açılış qarşılaşması olacaq.