Braziliya futbolunun ulduzu Neymarla bağlı gözlənilməz xəbər yayılıb. UOL portalının məlumatına görə, 34 yaşlı hücumçu peşəkar karyerasını başa vurmağı nəzərdən keçirir.

Braziliya millisinin DÇ-2026-nın 1/8 finalında Norveçə 1:2 hesabı ilə məğlub olaraq turnirlə vidalaşmasından sonra Neymar “sambaçılar”ın heyətində son matçına çıxdığı iddia edilirdi. Lakin UOL-un yaydığı son məlumatlar məsələnin daha ciddi olduğunu göstərir.

Xəbərdə bildirilir ki, hücumçunun yaxın ətrafı onun artıq böyük futboldan yorulduğunun fərqindədir: “Hələ Dünya Çempionatından əvvəl Neymarın yaxın çevrəsi onun futboldan doyduğunu bilirdi. Bunda təzyiqlər və mətbuatla gərgin münasibətlər də az rol oynamayıb.”

Mənbələrin verdiyi məlumata görə, təcrübəli forvard gələcəyi ilə bağlı yekun qərarını gələn həftələrdə verəcək. Hazırda masada üç əsas ssenari var: böyük futbolla tamamilə vidalaşmaq, təzyiqin daha az olduğu bir kluba keçmək və ya mövcud müqaviləsinin sonuna qədər komandada qalmaq.

34 yaşlı ulduzun “Santos”la olan müqaviləsi bu ilin dekabrında başa çatır. Neymar Braziliya milli komandasının heyətində keçirdiyi 130 matçda 80 qol və 58 məhsuldar ötürmə ilə yadda qalıb.