“Neftçi” və “Turan Tovuz”un potensial rəqibləri müəyyənləşib

25.05.26 | 11:56

UEFA Konfrans Liqasında mübarizə aparacaq “Neftçi” ilə “Turan-Tovuz”un təsnifat mərhələlərində qarşılaşa biləcəkləri rəqiblərin dairəsi genişlənir.

“Neftçi”nin 1-ci təsnifat mərhələsindəki yol xəritəsi

Turnirə 1-ci təsnifat mərhələsindən start verəcək “Neftçi” püşkatmada “səpələnməmişlər” səbətində yer alacaq. Paytaxt təmsilçisinin potensial rəqiblərinin sayı 23-ə çatıb. Siyahıya son olaraq “Velej Mostar” (Bosniya və Herseqovina), “Dinamo Siti” (Albaniya) və “Mondorf-le-Ben” (Lüksemburq) əlavə olunub.

“Neftçi”nin məlum olan digər potensial rəqibləri: Virtus (San Marino), Liepaya (Latviya), İlveş (Finlandiya), Santa Koloma (Andorra), Konnas Kuey (Uels), Styarnan (İslandiya), Avropa (Cəbəllütariq), İnter Turku (Finlandiya), Malışeva (Kosovo), Elimai (Qazaxıstan), Hegelmann (Litva), Penibont (Uels), Runavik (Farer adaları), Sileks (Şimali Makedoniya), Mornar-Bar (Monteneqro), Marsaşlokk (Malta), Nomme Kalyu (Estoniya) və Karnarfon (Uels).

1-ci təsnifat mərhələsinin püşkatma mərasimi iyunun 16-da keçiriləcək. Oyunlar isə 9 və 16 iyul tarixlərinə planlaşdırılıb.

“Turan-Tovuz” üçün çətin sınaq: 2-ci təsnifat mərhələsi

Turnirə birbaşa 2-ci təsnifat mərhələsindən qoşulacaq “Turan-Tovuz” da püşkatmada “səpələnməmişlər” sırasında yer alacaq. Tovuzluların potensial rəqibləri siyahısına daha 7 komanda daxil olub: “Ayaks” (Niderland), “Rakov” (Polşa), “Başakşəhər” (Türkiyə), “QKS Katovitse” (Polşa), “Hibernian” (Şotlandiya), “HB Torshavn” (Farer adaları) və “Sion” (İsveçrə).

Beləliklə, bölgə təmsilçimizin 42 potensial rəqibindən 23-ü artıq məlumdur. Digər rəqiblərin siyahısı belədir:

Kopenhagen (Danimarka), Panatinaikos (Yunanıstan), Partizan (Serbiya), Luqano (İsveçrə), AEK (Kipr), Riyeka (Xorvatiya), ÇFR Cluj (Rumıniya), HJK (Finlandiya), Jrinski Mostar (Bosniya və Herseqovina), Brann (Norveç), Spartak (Trnava, Slovakiya), Hradec Kralove (Çexiya), Austriya (Avstriya), Vaduts (Lixtenşteyn), Norşalland (Danimarka) və Tobol (Qazaxıstan).