UEFA Konfrans Liqasının II təsnifat mərhələsinin ilk oyununda təmsilçimiz “Neftçi” bu gün Belarusun Minsk “Dinamo” klubu ilə üz-üzə gələcək.

Yuri Vernidubun rəhbərlik etdiyi “ağ-qaralar” doğma meydanda sərfəli nəticə qazanaraq cavab görüşünə üstün yollanmağı hədəfləyir. Qarşılaşma “Palms Sports Arena”da keçiriləcək və saat 20:00-da başlayacaq.

Belarus mediası oyunu böyük maraqla izləyir. Yerli nəşrlər “Neftçi”ni avrokuboklarda zəngin təcrübəyə malik, keyfiyyətli heyəti və güclü məşqçi məktəbi ilə seçilən təhlükəli rəqib kimi qiymətləndirirlər. Xüsusilə baş məşqçi Yuri Vernidubun beynəlxalq təcrübəsi və komandanın nizam-intizamlı oyunu ön plana çəkilir.

Bununla yanaşı, Belarus mətbuatı Minsk “Dinamo”sunun əsas üstünlüyünün davam edən milli çempionat sayəsində qazandığı oyun ritmi olduğunu vurğulayır. Yerli ekspertlər cütün aşkar favoritinin olmadığını, taleyin iki oyunun yekununda müəyyənləşəcəyini bildirirlər.

UEFA Konfrans Liqası. II təsnifat mərhələsi, ilk oyun

20:00 “Neftçi” (Azərbaycan) – “Dinamo” (Minsk, Belarus)

Bu rəqiblərin cavab görüşü iyulun 30-da Bolqarıstanın Stara Zaqora şəhərində keçiriləcək.