Niderlandın millisinin penalti seriyalarındakı uğursuzluq zolağı davam edir. Monterreydə Mərakeşə qarşı keçirilən son matç, “narıncılar”ın 1992-ci ildən bəri dünya və Avropa çempionatlarında penalti seriyasında aldığı ardıcıl 7-ci məğlubiyyət oldu.

Dünya çempionatının 1/16 final mərhələsində Mərakeşlə qarşılaşan Niderland, əsas və əlavə vaxtı 1:1 hesabı ilə başa çatan oyundan sonra penaltilərdə 2:3 hesabı ilə uduzaraq turnirlə vaxtından əvvəl vidalaşdı. Bu məğlubiyyət, komandanın böyük turnirlərdəki köhnə yarasını yenidən qanatdı.

Tarixi uğursuzluğun xronologiyası

İlk seriya (Avro-92): “Narıncılar”ın böyük turnirlərdəki ilk penalti dramı 34 il əvvələ, Danimarka ilə Avro-1992-nin yarımfinalına təsadüf edib. Hazırkı baş məşqçi Ronald Kumanın zərbəsi dəqiq olsa da, əfsanəvi Marko van Bastenin qaçırdığı penalti komandanı turnirdən kənarda qoydu (4:5).

Ardıcıl uğursuzluqlar: “Narıncılar” 1992-2000-ci illər aralığında qatıldıqları ardıcıl üç Avropa çempionatının hər birində məhz penaltilərlə turnirdən kənarlaşdırılıblar. Avro-1996-nın 1/4 finalında Fransaya uduzan Niderland millisində bu gün Mərakeşlə matçdakı uğursuzluğu ilə diqqət çəkən Jüstin Klüivertın atası – Patrik Klüivertin zərbəsi dəqiq olmamışdı. Ev sahibliyi etdikləri Avro-2000-in yarımfinalındakı İtaliya dramında isə oyunsonu penaltilərdə Patrik Klüivertdan başqa heç bir Niderland futbolçusu toru silkələyə bilmədi.

Dünya çempionatlarındakı dram: Dünya çempionatları tarixində isə ilk analoji məğlubiyyət DÇ-1998-in yarımfinalında Braziliyaya qarşı oyunda (2:4) qeydə alınıb. Daha sonra komanda DÇ-2014-ün yarımfinalında, DÇ-2022-nin 1/4 finalında penaltilər seriyasında Argentinaya boyun əyib.

Mərakeşə uduzmaqla Niderland dünya çempionatlarında 4-cü, Avropa çempionatları da daxil olmaqla isə ümumilikdə 7-ci penalti məğlubiyyətini yaşadı. Maraqlıdır ki, Mərakeş penaltilərdə Niderlandı üstələyən ilk Afrika təmsilçisi oldu. Mərakeşlilər dörd il əvvəl Qətərdə keçirilən DÇ-2022-nin 1/8 finalında da İspaniyanı penaltilərdə 3:0 hesabı ilə keçərək pley-offa uğurlu start vermişdilər.

Niderland millisi bu qara zolaq fonunda tarixi boyu yalnız iki dəfə penalti seriyasından qalib ayrıla bilib:

1. Avro-2004 (1/4 final) İsveçə 5:4

2. DÇ-2014 (1/4 final) Kosta-Rikaya 4:3

Turnir                                   Mərhələ                                Oyun                                                     Hesab               Penalti 

Avro-1992                           Yarımfinal                              Niderland – Danimarka                   2:2                     4:5

Avro-1996                           1/4 final                                 Niderland – Fransa                           0:0                      4:5

DÇ-1998                               Yarımfinal                              Niderland – Braziliya                        1:1                      2:4

Avro-2000                           Yarımfinal                              Niderland – İtaliya                             0:0                      1:3

DÇ-2014                               Yarımfinal                              Niderland – Argentina                     0:0                      2:4

DÇ-2022                               1/4 final                                 Niderland – Argentina                     2:2                      3:4

DÇ-2026                               1/16 final                               Niderland – Mərakeş                       1:1                      2:3