Çempionlar Liqasının əsas mərhələsində “Qarabağ”ın növbəti rəqibi “Napoli”nin keçmiş oyunçusu Roberto Sosa komandanın  “Bolonya”ya uduzmasına (0:2) reaksiya verib. Xatırladaq ki, məğlubiyyət “Roma” və “İnter”in turnir cədvəlində “Napoli”ni geridə qoymasına səbəb olub. Ümumiyyətlə, Antonio Kontenin yetirmələri bütün turinlərdə keçirdikləri son beş oyunun yalnız ikisində qələbə qazanıblar və son üç oyunda hətta qol vura bilməyiblər.
Sosa “La Partita dei campioni” verilişində neapolluların məğlubiyyətini şərh edərkən futbolçuların Kontedən canlarını qurtarmaq isdədiklərini deyib: “Bu, oyunçuların məşqçidən yaxa qurtarmaq istədiyi tipik bir matç idi. Onlar iki qol fərqi ilə uduzsalar da, özlərini cox sakit aparır və heç əsəbiləşmirdilər. Bunu əvvəllər başqa komandalar barəsində də demişəm, indi isə “Napoli” haqqında deməliyəm”.
Onu da deyək ki, Sosa 2004-2008-ci illər aralığında “Napoli”nin formasını geyinib və 131 oyunda 30 qol vurub.
Bu arada italyan jurnalisti Matteo Moretto bildirib ki, Konte “Napoli”dən gedə bilər. Mənbənin məlumatına görə, 56 yaşlı italiyalı mütəxəssis noyabrın 10-da klub rəhbərliyi ilə görüşəcək. Görüşdə tərəflər əməkdaşlığı davam etdirib-etdirməmək məsələsini müzakirə edəcəklər.Konte 2024-cü ilin yayından “Napoli”yə rəhbərlik edir. Ötən mövsüm komanda onun rəhbərliyi altında İtaliya çempionluğunu qazanıb.