Millimizin hücumçusu Nəriman Axundzadənin formasını geyindiyi “Ərzurumspor” səfərdə “Amedspor”un qonağı olub. Görüş ev sahiblərinin 3:0 hesablı inamlı qələbəsi ilə yekunlaşıb. Yığmamızın gənc forvardı matçın 75-ci dəqiqəsində – artıq hər üç qol vurulduqdan sonra meydana çıxıb. Bununla da Axundzadə Türkiyə Super Liqasında debütünü rəsmiləşdirib.

Günün digər maraqlı qarşılaşmasında “Beşiktaş” doğma azarkeşləri önündə “Eyüpspor”u qəbul edib. “Qara qartallar” bu görüşdən 1:0 hesablı minimal qələbə ilə ayrılıblar. İstanbul təmsilçisinə üç xal qazandıran yeganə qola matçın 25-ci dəqiqəsində Vatslav Çernı imza atıb. Qonaq komandanın vəziyyətini bir az da çətinləşdirən məqam isə 68-ci dəqiqədə David da Koştanın ikinci sarı vərəqəni alaraq komandasını azlıqda qoyması olub.

Qarşılaşmada ən çox müzakirə olunan epizod isə qırmızı vərəqədən daha çox hakimin səssiz qaldığı bir epizod olub. Belə ki, “Beşiktaş”ın oyunçusu Calonun rəqibini saçından dartması böyük rezonans doğursa da, qarşılaşmanın baş hakimi bu kobud hərəkətə görə ona vərəqə göstərməyib. Referinin bu addımı azarkeşlər və idman ictimaiyyəti tərəfindən birmənalı qarşılanmayıb.

“Beşiktaş” yeni mövsümə 3 xalla inamlı start verib. “Ağ-qaralar” cümə axşamı avrokuboklar çərçivəsində evdə “Kauno Jalgiris”i qəbul edəcək, bazar günü axşam isə çempionatda “Alanyaspor”un qonağı olacaq. Ötən mövsüm elitadakı yerini son anda qorumağı bacaran “Eyüpspor” isə ilk turu xalsız başa vurub. Komanda ilk xallarını növbəti turda “Qaziantep FK” ilə keçiriləcək matçda qazanmağa çalışacaq.