Yenidən Madridə dönən 63 yaşlı Joze Mourinyo özünü doğma evindəki kimi hiss edir. 2026/27 mövsümündən etibarən “Real”ın baş məşqçi postuna gətirilən portuqaliyalı mütəxəssis, klubdakı ilk fəaliyyəti dövründə (2010–2013) yaşadığı həmin dəbdəbəli malikanəyə köçüb.

Mourinyonun seçdiyi mülk Madridin qərbində yerləşən, yüksək təhlükəsizliyi və məxfiliyi ilə tanınan elit “La Finka” yaşayış massivində yerləşir. Belçikanın HLN nəşrinin məlumatına görə, əraziyə yalnız sakinlərin və xüsusi heyətin girişinə icazə verildiyindən, buranı bir çox idman ulduzu üstün tutur. Portuqaliyalı çalışdırıcının qonşuları arasında “Kral klubu”nun ulduzları Kilian Mbappe və Cud Bellingem, eləcə də “Atletiko”nun baş məşqçisi Diyeqo Simeone var.

5000 kvadratmetrdən böyük ərazidə yerləşən bu möhtəşəm malikanənin yaşayış sahəsi 1400 kvadratmetr təşkil edir. Hündür tavanları və geniş pəncərələri ilə seçilən dəbdəbəli evin böyük bağçası və şəxsi hovuzu var.

İspaniya mətbuatının məlumatına görə, villanın aylıq icarə haqqı 20 000 avrodur. «Kral klubu» ilə 3 illik müqavilə imzalayan Mourinyo bu müddət ərzində yalnız yaşayış yeri üçün ümumilikdə 720 000 avro məbləğində xərc çəkəcək.

Bununla belə, bu xərc təcrübəli mütəxəssis üçün problem yaratmayacaq. Belə ki, 63 yaşlı baş məşqçinin «Real»dakı aylıq məvacibinin təxminən 1 milyon avro olduğu bildirilir.