Yüksək Liqada debütə hazırlaşan “Möminə Xatun” qadın voleybol klubu ev oyunlarını doğma azarkeşləri önündə keçirəcək. Naxçıvan təmsilçisi rəqiblərini İlham Əliyev adına Olimpiya İdman Kompleksində qəbul edəcək.
Klubdan verilən məlumata görə, hazırda arenasının matçlara hazır olması üçün lazımi işlər aparılır. Komanda rəhbərliyi Naxçıvanda oynamağın əlavə motivasiya mənbəyi olacağını və regionda voleybol ənənələrinin mühüm rol oynadığını vurğulayıb.
Məşqçi və oyunçu heyətini tamamlamaq üzrə olan klubda yerli və əcnəbi voleybolçularla yanaşı, komandanın öz yetirmələrinə də geniş yer veriləcək. Şərəfini qoruyacaq heyətdə 10-a yaxın naxçıvanlı idmançı yer alacaq. Bundan başqa, gənc voleybolçuların inkişafını təmin etmək məqsədilə “B” komandası da formalaşdırılacaq.
“Möminə Xatun”un əsas hədəfi gələcəkdə komandanın nüvəsini məhz öz akademiya yetirmələrindən qurmaq, regionda qızların voleybola marağını artırmaq və Muxtar Respublikada bu idman növünün davamlı inkişaf mexanizmini təmin etməkdir.