Portuqaliyalı mütəxəssis Qonsalu Feyunun böyük qayıdışı baş tutur. “Meczyki” nəşrinin tanınmış jurnalisti Tomaş Vłodarczyk xəbər verir ki, 36 yaşlı çalışdırıcı millimizin forvardı Mahir Emrelinin formasını geyindiyi “Rakov” klubunun sükanı arxasına keçəcək.

Sentyabrın 3-də axşam saatlarında məşqçinin Polşaya yola düşdüyü bildirilsə də, hələlik son qərarın verilmədiyi qeyd olunurdu. Belə ki, Feyu klubun sahibi Mixal Şverçevski ilə şəxsən görüşməli və bundan sonra qəti qərar qəbul olunmalı idi. Son məlumatlara görə, tərəflər nəhayət razılığa gəliblər. Tomaş Vłodarczyk “X” platformasında yazıb: “Portuqaliyalı gələn həftə işə başlayacaq”.

Yeni baş məşqçinin qarşısında son dərəcə çətin vəzifə durur: komandanı dərin böhrandan çıxarmaq. Cari mövsümə uğursuz başlayan “Rakov” çempionatda keçirdiyi ilk beş matçın hamısında məğlub olub. Bundan başqa, kollektiv Konfrans Liqasının təsnifat mərhələsində də uğursuz çıxış edərək mübarizəni dayandırıb.

Bu nəticələr fonunda cari ilin mayında komandanın baş məşqçisi təyin olunmuş David Kroçek istefaya göndərilib. Çərşənbə axşamı “Qornik” ilə matçda (2:1 məğlubiyyət) komandaya müvəqqəti olaraq David Şulçek rəhbərlik etsə də, onun tezliklə əvəzlənəcəyi dəqiq idi.       

Bu, Feyunun “Rakov”da baş məşqçi kimi ilk təcrübəsi olacaq. O, daha əvvəl – 2020-2022-ci illərdə həmin vaxt komandaya rəhbərlik edən Marek Papşunun köməkçisi kimi Çenstoxova təmsilçisində çalışıb.