Almaniya İkinci Bundesliqasında 33-cü turun oyunları çərçivəsində təmsilçimiz Mahir Emrelinin çıxış etdiyi “Kayzerslautern” doğma meydanda “Arminiya”nı (Bilefeld) sınağa çəkib.

Qarşılaşmaya sürətli başlayan meydan sahibləri rəqibini təzyiq altında saxlayaraq istəyinə nail olublar. “Qırmızı şeytanlar” hər iki qolu birinci hissənin əvvəlində vuraraq oyunun taleyini faktiki olaraq həll ediblər. Görüşün qalan dəqiqələrində üstünlüyünü qoruyan “Kayzerslautern” meydandan 2:0 hesablı qələbə ilə ayrılıb.

Azərbaycan milli komandasının hücumçusu Mahir Emreli matça ehtiyat oyunçular skamyasında başlayıb. Baş məşqçinin qərarı ilə o, 65-ci dəqiqədə mübarizəyə qoşularaq komandasının qələbə hesabını qorumasına kömək edib.

Bu vacib 3 xaldan sonra aktivindəki xalların sayını 49-a çatdıran “Kayzerslautern” turnir cədvəlində 6-cı pillədəki mövqeyini möhkəmləndirib.