Premyer Liqanın 29-cu turunun bağlanış matçında lider “Sabah” öz meydanında turnir cədvəlinin son pillələrində qərarlaşan “Karvan-Yevlax”ı sınağa çəkdi. Çempionluq yolunda inamla irəliləyən “bayquşlar” bu oyundan da 3 xalla ayrılaraq zirvədəki mövqelərini daha da möhkəmləndiriblər.
Matçın favoriti hesab olunan Valdas Dambrauskasın yetirmələri oyuna üstünlüklə başlasalar da, ilk hissədə “Karvan-Yevlax”ın müdafiə səddini yarmaqda çətinlik çəkirdilər. Lakin 36-cı dəqiqədə baş verən hadisə oyunun axarını dəyişdi. Qonaqların futbolçusu Qavi Tompson ikinci sarı vərəqəni alaraq meydandan qovuldu və Yevlax təmsilçisini azlıqda qoydu.
İkinci hissəyə say üstünlüyü ilə başlayan “Sabah” təzyiqi artırdı və çox keçmədən bunun bəhrəsini gördü. 49-cu dəqiqədə Orfi Mbina hesabı açaraq “bayquşlar”ı önə keçirdi. Cəmi 6 dəqiqə sonra, 55-ci dəqiqədə Aaron Maluda rəqib qapısına ikinci yolu taparaq matçın taleyini böyük ölçüdə həll etdi.
64-cü dəqiqədə “Sabah”ın aparıcı üzvü Aleksey İsayev birbaşa qırmızı vərəqə alaraq meydanı tərk etdi. Bununla da meydanda say bərabərliyi yaransa da, “Karvan-Yevlax” qalan dəqiqələrdə liderin müdafiəsini yarmaq üçün ciddi təhlükə yarada bilmədi. “Sabah” təcrübəsi sayəsində üstünlüyü sona qədər qoruyaraq qızıl medallara bir addım da yaxınlaşdı.
SABAH – KARVAN-YEVLAX 2:0 (0:0)
Qollar: Orfi Mbina, 49 (1:0). Aaron Maluda, 55 (2:0)
Baş hakim: Kamranbəy Rəhimov.
“Sabah”: Stas Pokatilov (k), Aleksey İsayev, Rəhman Daşdəmirov, Velko Simiç, İqor Noqeyra, Akim Zedadka (Amin Seydiyev, 89), Timoteuş Puxaç, İvan Lepinitsa, Orfi Mbina (Xəyal Əliyev, 73), Umarəli Rəhmonəliyev (Kahim Parris, 56), Aaron Maluda (Cessi Sekidika, 89).
“Karvan-Yevlax”: Pedru Mateuş, Vadim Abdullayev (k), Vüsal Məsimov, Samir Abdullayev (Rauf Rüstəmli, 61), Emin Rüstəmov, Şakil Sno, Kayl Spens (Moyze Nqvisani, 56), Qavi Tompson, Peter Kinqs (Samuel Dyurrant, 56), İmani Barker, Olavale Doeni.
Baş məşqçi: Füzuli Məmmədov.
Sarı vərəqələr: Qavi Tompson, 15. Akim Zedadka. 75.Qırmızı vərəqələr: Qavi Tompson, 36 (ikinci sarı vərəqə), Aleksey İsayev, 64 (birbaşa).