Azərbaycan I Liqasında çıxış edən “ASTA Mingəçevir”in cari mövsümün ilk yarısında üzləşdiyi ciddi maliyyə böhranının pərdəarxası məqamları məlum olub. Komandada futbolçuların maaşlarını ala bilmədiyi və klubun fəaliyyətinin sual altına düşdüyü çətin dövrdə gözlənilməz kömək gəlib.
Məlumata görə, Azərbaycan millisinin sabiq hücumçusu və Bakı “Standart”ının keçmiş baş məşqçisi Badri Kvaratsxeliya mingəçevirlilərə yardım əlini uzadıb. Hazırda Fransanın PSJ klubunda çıxış edən ulduz futbolçu Xviça Kvaratsxeliyanın atası, “ASTA Mingəçevir”in baş məşqçisi Ramiz Məmmədovla olan köhnə dostluğuna sadiq qalaraq, kluba 200 000 manat maddi vəsait ayırıb. Məhz bu maliyyə dəstəyi sayəsində bölgə təmsilçisi böhrandan çıxaraq fəaliyyətini davam etdirə bilib.