İtaliya futbolunda böyük canlanma var: “La Gazzetta dello Sport” nəşrinin yaydığı məlumata görə, İtaliya Futbol Federasiyası (FIGC) milli komandanın sükanı arxasına Pep Qvardiolanı gətirmək niyyətindədir. Lakin bu iddialı layihənin qarşısında dayanan ən böyük maneə maliyyə məsələləridir.

Hazırda “Mançester Siti”də çalışan Qvardiolanın gəliri fantastik rəqəmlərlə ölçülür. Kataloniyalı mütəxəssis İngiltərədə ildə vergilər daxil olmaqla 24,8 milyon avro qazanır. Vergilər çıxıldıqdan sonra bu rəqəm bonuslar nəzərə alınmadan təxminən 14 milyon avro təşkil edir.

Müqayisə üçün qeyd edək ki, İtaliya millisinin tarixində ən çox maaş alan məşqçi olmuş Roberto Mançininin illik xalis gəliri cəmi 3 milyon avro idi. Digər böyük milli komandaların büdcələri də fərqlidir. Tomas Tuxel (İngiltərə) və Yulian Naqelsman (Almaniya) italyan həmkarlarından xeyli çox qazanır.

Digər tərəfdən, dünya çempionu Lionel Skaloni (Argentina) ildə 2 milyon avro, Avropa çempionu Luis de la Fuente (İspaniya) isə cəmi 1,2 milyon avro maaş alır.

İtaliya tərəfi bu maliyyə problemini həll etmək üçün xüsusi strateji plan hazırlayıb. Belə ki, 2014-cü ildə Antonio Kontenin təyinatı zamanı texniki sponsor maaşın yarısını öz üzərinə götürmüşdü. Hazırda Federasiyanın əsas tərəfdaşı olan Puma şirkəti, həm də Qvardiolanın şəxsi brend elçisidir. Bu amil maliyyə yükünü paylaşmaq üçün real imkanlar yaradır.

İtaliya millisinin sabiq ulduzu və hazırda federasiyada məşqçi kimi çalışan Leonardo Bonuççi belə deyib: “İşə məhz Qvardioladan başlamaq lazımdır, çünki o, İtaliya üçün ən ideal namizəddir. Bunun çətinliyini anlasam da, hesab edirəm ki, böyük hədəflər üçün xəyal qurmağa dəyər”.  

İtalyanlar Qvardiolanı təkcə nəticə üçün deyil, həm də ölkədə gənc məşqçilərin yetişdirilməsi üçün yeni model yaratmaq məqsədilə dəvət etmək istəyirlər.Gələcək qeyri-müəyyəndir: Qvardiolanın “Mançester Siti”də qalıb-qalmayacağı hələ dəqiqləşməyib. “The Guardian”ın iddiasına görə, əgər Pep İngiltərəni tərk edərsə, onu “Çelsi” və “Lester”in sabiq çalışdırıcısı, italyan mütəxəssis Entso Mareska əvəz edə bilər.