Dünya çempionatının 1/16 final mərhələsində İsveçrə millisi Əlcəzairi 2:0 hesabı ilə məğlub edərək növbəti mərhələyə vəsiqə qazandı. Qrup lideri kimi pley-offa yüksələn “qırmızı xaçlılar”dan fərqli olaraq, “səhra tülküləri” ən yaxşı üçüncü yerlərin reytinqi sayəsində bu mərhələyə adlamışdılar.

İsveçrənin baş məşqçisi Murat Yakın son matçla müqayisədə start heyətində iki dəyişiklik edərək Jak və Sounun əvəzinə Zakariya ilə Ndoyeni meydana buraxmışdı. Əlcəzairin sükanı arxasında olan və vaxtilə 7 il İsveçrə millisinə rəhbərlik etmiş Vladimir Petkoviç isə üç yerdəyişikliyə əl atmışdı: Benbuta, Acam və Quiri öz yerlərini Zidan, Ait-Nuri və Zerrukiyə güzəştə getmişdilər.

 İsveçrə ilk təhlükəli hücumundaca hesabı açdı. Təşəbbüsü üzərinə götürən Manzambi topu irəli daşıyaraq cərimə meydançasına ötürdü, orada mövqe seçən Breel Embolo dəqiq toxunuşla komandasını önə keçirdi.

İlk hissənin sonuna yaxın əlcəzairlilər Auar, Şaibi və Mazanın uzaq və orta məsafələrdən zərbələri ilə tarazlığı bərpa etməyə çalışsalar da, bu cəhdlər ya qeyri-dəqiq, ya da zəif alındı. İsveçrənin heyətində isə Zakariyanın zərbələrində kəsər çatmadı.

İkinci hissə Petkoviçin komandası üçün kabusla başladı. Müdafiədə topu uzaqlaşdırmaq istəyərkən ardıcıl üç kobud səhv edən Əlcəzair millisi cəzalandı. Təzyiq nəticəsində qazanılan topu Dan Ndoye uzaq küncə göndərdi; qapıçı Zidan toxunsa da, topun tora daxil olmasına mane ola bilmədi.

Qoldan dərhal sonra Əlcəzair fərqi azaltmağa çox yaxın idi, lakin Denis Zakariya son anda Riyad Marezin təhlükəli zərbəsinin qarşısını kəsdi. Digər qapı qarşısında isə Embolo, Varqasın sürətli ötürməsini tamamlaya bilsəydi, dubl edə bilərdi.

Matçın sonlarına doğru Əlcəzairin heyətində Mussanın asma-zərbə qarışıq vuruşunu qapıçı Yann Zommer (Kobel) akrobatik sıçrayışla dəf etdi. İsveçrə isə hesabı darmadağın həddinə çatdıra bilərdi, lakin Rieder boş qapıya düşə bilmədi, Freylerin zərbəsində isə qapıçı Zidan qurtarışla yadda qaldı.

Yakının yetirmələri inamlı qələbə ilə 1/8 finala vəsiqə qazandılar. İsveçrənin bu mərhələdəki rəqibi Kolumbiya – Qana cütünün qalibi olacaq.

Dünya Çempionatı, 1/16 final

İsveçrə – Əlcəzair – 2:0

Qollar: Embolo (11), Ndoye (46)

Baş hakim: Yael Falkon (Argentina)

İsveçrə: Kobel, Rodriqes, Akanci, Elvedi, Zakariya (Vidmer, 87), Caka, Freyler, Varqas (Rieder, 71), Manzambi (Okafor, 71), Ndoye (Ebişer, 87), Embolo (Amduni, 83).

Əlcəzair: Zidan, Ait-Nuri, Bensebayni, Mandi, Belqali (Bulbina, 83), Bentaleb (Mussa, 71), Zerruki (Quiri, 59), Şaibi, Auar (Acam, 59), Marez (Mussa, 71), Maza.

Xəbərdarlıqlar: Şaibi (36), Budaui (72)

Stadion: “Bi Si Pleys” (Vankuver, Kanada)