İranın iyunun 11-də start götürəcək mundialda iştirakı ilə bağlı müəyyən şübhələr olsa da, minlərlə azarkeş Tehrandakı İnqlab meydanına axışaraq milli komandaya böyük sevgi nümayiş etdirib. Turnir öncəsi hazırlıq məqsədilə Türkiyəyə yollanan futbolçular paytaxtda təntənəli şəkildə yola salınıblar.

İran Futbol Federasiyasının (FFIRI) prezidenti Mehdi Tac dövlət televiziyasına açıqlamasında azarkeşlərin dəstəyini yüksək qiymətləndirib: “Bu, qatıldığımız son dörd dünya çempionatı öncəsi yaşadığımız ən yaxşı vida mərasimidir. Azarkeşlər bura ləyaqət, şərəf və güclü ruhla gəliblər. Nəticədən asılı olmayaraq, arzumuz İran bayrağının hər zaman yüksəklərdə dalğalanmasıdır”.

İran DÇ-2026-ya vəsiqəni ilk təmin edən ölkələrdən biri olsa da, regiondakı siyasi vəziyyət komandanın iştirakını sual altına qoyub. Xüsusilə fevralda ABŞ və İsrailin həyata keçirdiyi hava zərbələrindən sonra İranın Şimali Amerikaya gedib-getməyəcəyi proqnozlaşdırılması çətin məsələyə çevrilib.

Federasiya rəhbəri Mehdi Tacın özünə də bir müddət əvvəl Kanada tərəfindən viza qadağası qoyulub. FFIRI-nin baş katibi Hidayət Mombeini viza məsələsi ilə bağlı nikbinliyini qorumağa çalışsa da, narahatlığını gizlətməyib: “Hazırda vizalarla bağlı konkret məlumatımız yoxdur. Ümid edirik ki, bu məsələ vaxtında həll olunacaq. FİFA bizə müəyyən vədlər verib və bütün oyunçularımızın vizalarını vaxtında alacağını gözləyirik”.

İran millisi hazırlıq çərçivəsində mayın 29-da Antalyada Qambiya ilə yoldaşlıq oyunu keçirəcək. Federasiya Türkiyə toplanışında daha bir yoxlama görüşü təşkil etməyə çalışır.