UEFA Konfrans Liqasının III təsnifat mərhələsinin ilk oyununda «Qarabağ»ı minimal hesabla məğlub edən Kiyev «Dinamo»sunun baş məşqçisi İqor Kostyuk qarşılaşmadan sonra fikirlərini bölüşüb. Ukraynalı mütəxəssis qələbənin əsas səbəblərindən, komandadakı yeniliklərdən və Bakıdakı cavab oyunu öncəsi gözləntilərindən danışıb.

Kostyuk bildirib ki, Polşadakı qarşılaşmada qələbənin baş memarı nümayiş etdirilən xarakter və meydandakı komanda ruhu olub. Onun sözlərinə görə, qarşılaşma üçün hazırlanan taktiki plan özünü tamamilə doğruldub: “Meydanda əsl komanda var idi və məhz bu amil bizə istədiyimiz nəticəni gətirdi. Oyun öncəsi heyətdə kiçik rotasiyaya əl atdıq, əvəzləmələrlə oyunun keyfiyyətini və dinamikasını artırmağa çalışdıq. Yaxşı qol imkanları yaratdıq, rəqibin presinqindən uğurla çıxdıq və topu itirdikdən sonra sürətlə kontr-presinq tətbiq etdik. Hətta daha çox qol vura bilərdik, lakin təəssüf ki, bütün imkanlarımızdan yararlana bilmədik”.

Əfsanəvi mütəxəssis Valeri Lobanovskinin prinsiplərinə istinad edən «Dinamo»nun çalışdırıcısı komandanın hələ formalaşma mərhələsində olduğunu vurğulayıb. İcarədən qayıdan futbolçularla yeni oyun əlaqələri və kombinasiyalar üzərində işlədiklərini bildirən Kostyuk, komandasının inkişaf tempindən razı qaldığını qeyd edib.

Ukrayna çempionatının startında «Veres»lə keçiriləcək qarşılaşmanın Bakıdakı cavab oyunu öncəsi komandaya mane olmayacağını deyən Kostyuk, heyətin genişliyinə güvəndiyini bildirib. O, daxili çempionat matçının futbolçulara əlavə özünəinam qazandıracağını və «Qarabağ»la Bakıdakı həlledici görüşə daha yaxşı hazırlaşmağa kömək edəcəyini vurğulayıb.