Çərşənbə günü keçiriləcək İngiltərə – Argentina yarımfinal matçı öncəsi rəqib tərəfin mətbuatı Cud Belligemin zədələndiyini iddia edib. İngiltərə düşərgəsində isə ulduz futbolçunun durumu ilə bağlı narahatlıq artır.

Narahatlığa səbəb 1/4 finalda Norveçə qalib gəldikləri oyundan sonra yayılan görüntülər olub. Mayamidəki “Hard Rock” stadionunun miks-zonasından keçərkən 23 yaşlı yarımmüdafiəçinin sol çiynini tutduğu və ağrı hiss etdiyi görünür. Baş məşqçi Tomas Tuxellə söhbət zamanı da eyni çiyninə toxunması şübhələri daha da artırıb.

Belligemin sol çiyin problemi təzə deyil. O, “Real”ın heyətində zədələndikdən sonra ötən ilin iyulunda əməliyyat olunmuşdu. Hətta çiynindəki əməliyyat yığmanın düşərgəsindən çəkilən fotolarda da aydın görünür. Mütəxəssislərin fikrincə, kəskin fiziki gərginlik zamanı həmin nahiyədə ağrılar təkrarlana bilir.

Buna baxmayaraq, “Real”ın ulduzu cari Dünya Çempionatında möhtəşəm təsir bağışlayır. Keçirdiyi 6 oyunda 6 qol vuran Belligem, xüsusilə Norveçlə dramatik matçda dubl edərək komandasını yarımfinala daşıyan qəhrəman oldu.

Şayiələrə baxmayaraq, İngiltərə düşərgəsində heç kim onun Atlantadakı “Mercedes-Benz” stadionunda Argentinaya qarşı meydana çıxacağına şübhə etmir. Ən pis halda, o, Maddridə olduğu kimi sahəyə xüsusi fiksəedici sarğı ilə daxil olacaq.

Qolu sınan Cordan Henderson və Norveçlə oyunda kiçik narahatlıq yaşayan Deklan Raysı çıxmaq şərtilə, ingilislərin heyətində başqa ciddi itki yoxdur.