FIFA-da növbəti böyük qalmaqal alovlanıb. Təşkilatın Baş Əməliyyat Direktoru (COO) Kevin Lamur prezident Canni İnfantinonun planlarını açıq şəkildə tənqid etdikdən sonra vəzifəsindən kənarlaşdırılıb.
“The Athletic” nəşrinin məlumatına görə, tərəflər arasında gərginliyə İnfantinonun Dünya Çempionatının kommersiya gəlirlərinin bir hissəsini özəl investorlara satmaq istəyi səbəb olub. AP agentliyinə müsahibəsində bu layihəyə kəskin etiraz edən Lamur rəhbəri tərəfindən aldadıldığını bildirib. Eyni məsələyə görə İnfantinonun müşaviri Karlos Kordeyro da etiraz əlaməti olaraq istefa verib.
FIFA avqustun 17-də Lamurla əməkdaşlığa son qoyulduğunu rəsmən təsdiqləyib.
FIFA-nın baş katibi Matias Qrafström əməkdaşlara göndərdiyi elektron məktubda bu qərarın hərtərəfli təhlildən sonra, Lamurun peşəkarlığına və şəxsiyyətinə böyük hörmətlə qəbul edildiyini vurğulayıb.
Əvvəllər UEFA-da İnfantinonun müavini kimi çalışan və 2024-cü ildən FIFA-da bu vəzifəni icra edən Lamur rəhbərliyi tənqid edərkən işini itirə biləcəyini öncədən nəzərə aldığını gizlətməmişdi: “Futbol rəhbərlərinin doğru suallar vermək və düzgün qərarlar qəbul etmək vaxtı çatıb. Əgər fikirlərimi dediyim üçün işimi itirəcəəmsə, qoy elə olsun. Bu qərara hörmətlə yanaşıram. Ən azından bu gecə vicdanım rahat yatacam”.