Beynəlxalq Şahmat Federasiyası (FIDE) avqust ayı üçün yenilənmiş dünya reytinqini açıqlayıb.

Azərbaycan şahmatçıları arasında ən yüksək göstərici yenə Şəhriyar Məmmədyarova məxsusdur. 41 yaşlı qrossmeyster ötən ayla müqayisədə bir pillə irəliləyərək 2723 xalla 22-ci sıraya yüksəlib.

Teymur Rəcəbov 2689 xalla 38-ci yerdəki mövqeyini qoruyub. Aydın Süleymanlı isə 10 pillə irəliləyərək 2668 xalla 47-ci yerə yüksəlib. Rauf Məmmədov bir pillə irəliləyərək 2639 xalla 83-cü olub. Məhəmməd Muradlı isə 20 pillə geriləyərək 2630 xalla 98-ci sırada qərarlaşıb.

Kişilərin reytinqinə 2823 xalla norveçli Maqnus Karlsen başçılıq edir. ABŞ təmsilçiləri Fabiano Karuana (2792) və Hikaru Nakamura (2792) ilk üçlüyü tamamlayırlar.

Qadın şahmatçıların reytinqində son Azərbaycan çempionu Ülviyyə Fətəliyeva bir pillə geriləyərək 2440 xalla 25-ci yerdə qərarlaşıb. Gövhər Beydullayeva 11 pillə irəliləyərək 2392 xalla 53-cü, Xanım Balacayeva bir pillə yüksələrək 2356 xalla 81-ci olub. Günay Məmmədzadə isə üç pillə geriləyərək 2351 xalla 89-cu sıraya enib.

Qadınların reytinqinə 2596 xalla çinli Hou Yifan liderlik edir. Onun həmyerliləri Ley Tincze (2561) ikinci, Tszyuy Ventszyun (2553) isə üçüncü pillədə qərarlaşıb.