Premyer Liqanın son turunda “Sabah”a məğlub olan “Zirə”nin yarımmüdafiəçisi Eren Aydın ölkə mediasına qarşılaşma barədə fikirlərini bölüşüb.

Futbolçu fərdi səhvlərin oyunun taleyini həll etdiyini vurğulayıb: “Matça əslində yaxşı başlamışdıq. Lakin buraxdığımız fərdi səhvlər ucbatından hesab bir anda 0:3 oldu. Bu hesabdan sonra ‘Sabah’ kimi rəqiblə mübarizə aparmaq çox çətindir. Onların meydana əsas heyətlə çıxacağını gözləyirdik, çünki titullarını qorumaq niyyətindədirlər. Bütün bunlara baxmayaraq, biz hücum futbolu nümayiş etdirdik. ‘Sabah’ın qapısı önündə bu qədər çox qol epizodu yaradan ikinci bir komanda xatırlamıram. Bəli, 0:5 hesabı ilə yenildik, lakin bu, yalnız müdafiə xəttində zəif çıxış etməyimizlə bağlı idi. Rəqibi təbrik edirəm. Çempionlar Liqasında onlara uğurlar arzulayıram, ümid edirəm ki, ölkəmizi layiqincə təmsil edəcəklər”.

Eren Aydın növbəti turlarda onları çətin sınaqların gözlədiyini də dilə gətirib: “Qarşıda bizi ‘Qarabağ’ və ‘Turan-Tovuz’la oyunlar gözləyir. Ümid edirəm ki, bu matçlarda daha uğurlu nəticələr əldə edəcəyik. Ağdam təmsilçisi heyətini ciddi transferlərlə gücləndirib. Biz də öz növbəmizdə meydanda yaxşı futbol göstərmək istəyirik”.