Belarusun “Dinamo” (Minsk) klubunun baş məşqçisi Aleksandr Şaqoyko UEFA Konfrans Liqasının II təsnifat mərhələsində sabah Azərbaycan təmsilçisi “Neftçi”yə qarşı keçirəcəkləri ilk oyun öncəsi fikirlərini bölüşüb.

Təcrübəli mütəxəssis rəqibə böyük hörmətlə yanaşdıqlarını bildirib: “Biz anlayırıq ki, güclü rəqibə qarşı oynayacağıq. “Neftçi” həqiqətən də yaxşı və güclü komandadır. Qarşılaşmanın əhəmiyyətini tam dərk edirik. Oyuna ciddi yanaşmışıq və yaxşı hazırlaşmışıq. Cütün taleyini iki oyun həll edəcək. Məqsədimiz növbəti mərhələyə yüksəlməkdir. Belə səviyyəli görüşlərdə tez-tez iştirak etmirik. “Neftçi”nin səviyyəsi kifayət qədər yüksəkdir”.

Şaqoyko Azərbaycan klubunun həm heyətini, həm də baş məşqçisini xüsusi qeyd edib. O, “”Neftçi”ni necə dəyərləndirirsiniz və komandanın əsas üstünlükləri hansılardır” sualının cavabında bunları söyləyib: “Dediyim kimi, “Neftçi” güclü heyətə malik yaxşı komandadır. Baş məşqçi Yuri Vernidub da yüksək səviyyəli mütəxəssisdir. O, vaxtilə güclü klublarda çalışıb. Bundan başqa, “Neftçi” kombinasiyalı futbol nümayiş etdirir. Bu komanda haqqında məndə ən müsbət təəssüratlar formalaşıb”.

Belaruslu çalışdırıcı cütün favoriti barədə danışarkən komandaların şanslarını bərabər qiymətləndirib: “Oyundan əvvəl şanslar həmişə bərabər olur. Bu dəfə də fərqli deyil. Təbii ki, bizim də öz məqsədimiz var və ona çatmaq üçün əlimizdən gələni edəcəyik”.

Şaqoyko Belarus klublarının beynəlxalq oyunlarını doğma meydanda keçirə bilməməsinin komanda üçün müəyyən çətinliklər yaratdığını da etiraf edib: “Əlbəttə, doğma meydanda oynamağı çox istərdik. Öz azarkeşlərimizin qarşısında çıxış etmək tamam fərqli hissdir. Təəssüf ki, hazırkı şəraitdə bu mümkün deyil. Daim səfərlərə çıxmaq məcburiyyətində qalırıq ki, bu da müəyyən çətinliklər yaradır. Şübhəsiz ki, doğma azarkeşlərimizin dəstəyi bizə yüz faiz kömək edərdi”.