FİFA prezidenti Canni İnfantino Dünya Çempionatının iştirakçı sayının növbəti dəfə artırılması imkanlarını yenidən gündəmə gətirib.

Bu il ilk dəfə 48 komandanın qatıldığı turnirin ardınca FİFA iştirakçı sayını 64-ə çatdırmağı nəzərdən keçirir. Ali futbol qurumun rəhbəri bu məsələnin çempionat bitdikdən sonra müvafiq komitələrdə geniş müzakirə olunacağını bildirib.

İnfantino komanda sayının artırılmasını belə əsaslandırıb: “Dünya Çempionatı təkcə Avropa və Cənubi Amerika üçün deyil, bütün dünya üçün təşkil olunmalıdır. Hər bir ölkə bu turnirdə oynamaq arzusu ilə yaşamalıdır. Hazırda dünyada futbolun səviyyəsi sürətlə yüksəlir. Əgər kiçik ölkələrə bu şansı verməsək, onların inkişaf etmək üçün heç bir motivasiyası qalmayacaq”.

FİFA rəhbəri mümkün dəyişikliklərin nə vaxtdan qüvvəyə minəcəyi və bu sistemdə təqviminin necə tənzimlənəcəyi barədə hələlik məlumat verməyib.

Qeyd edək ki, 2030-cu ildə keçiriləcək növbəti mundial 6 ölkədə (İspaniya, Portuqaliya, Mərakeş, Uruqvay, Argentina və Paraqvay) təşkil olunacaq və mövcud plana əsasən, turnirdə 48 komandanın iştirakı nəzərdə tutulub.