FIFA dünya çempionatının iştirakçılarının sayını 48-dən 64-ə çatdırmaq ideyasını gündəmdə saxlayır. Press Association nəşrinin məlumatına görə, qurum mümkün islahatla bağlı növbəti mərhələnin vaxt cədvəlini də müəyyənləşdirib. Bildirilir ki, FIFA DÇ-2030-da iştirakçı sayının artırılmasının mümkün nəticələrini qiymətləndirmək üçün müstəqil şirkət cəlb edəcək. Potensial podratçılardan təkliflər avqustun 7-dək qəbul ediləcək, qalib şirkət isə avqustun 14-də müəyyənləşdiriləcək.

Seçiləcək şirkət sentyabrın 11-dək geniş analitik hesabat hazırlayaraq FIFA-ya təqdim etməlidir. Bundan sonra təşkilat dünya çempionatının 64 komandanın iştirakı ilə keçirilməsinin perspektivlərini dəyərləndirəcək.

Qeyd olunur ki, iştirakçı sayının artırılması ideyası FIFA prezidenti Canni İnfantino ünvanına yönələn tənqidlər fonunda müzakirə olunur. İslahatın əleyhdarları hesab edirlər ki, özəl investorların prosesə cəlb olunması gələcəkdə böyük futbol turnirlərinin miqyasının və keçirilmə tezliyinin daha da artmasına səbəb ola bilər.