Fransa hökuməti DÇ-2026-nın İspaniya ilə yarımfinal matçı və Bastiliya günü münasibətilə ölkə miqyasında analoqu olmayan təhlükəsizlik rejiminə keçib.

Ölkənin daxili işlər naziri Loran Nunyes çərşənbə axşamı keçiriləcək matç və bayram şənlikləri zamanı asayişi qorumaq üçün ümumilikdə 70 000 polis və jandarma qüvvəsinin səfərbər edildiyini açıqlayıb. BFM TV-yə müsahibəsində nazir, xüsusi təhlükəsizlik əməliyyatının çərşənbə axşamından çərşənbəyə keçən gecə boyunca davam edəcəyini bildirib.

Təkcə Parisdə Yelisey çöllərində təşkil olunacaq hərbi parad və azarkeş kütləsinin təhlükəsizliyi üçün 5 000 hüquq-mühafizə əməkdaşı ayrılıb. Nazir vurğulayıb ki, hər hansı asayiş pozuntusuna qarşı “sıfır dözümlülük” nümayiş etdiriləcək.

Nunyes 1/4 finalda Fransanın Mərakeşə qalib gəldiyi (2:0) oyundan sonra asayiş keşikçilərinin öhdəliklərini layiqincə yerinə yetirməsinə baxmayaraq, xoşagəlməz insidentlərin yaşandığını qeyd edib: “Təəssüf ki, Nor departamentində 17 yaşlı bir qızın ölümü ilə nəticələnən bədbəxt hadisə baş verdi. Ümumilikdə isə 89 nəfər saxlanıldı”. Fransada xüsusilə PSJ və yığmanın böyük qələbələrindən sonra kütləvi iğtişaşlar, mağazaların və avtomobillərin yararsız hala salınması halları tez-tez yaşanır. Məsələn, PSJ-nin Çempionlar Liqasının finalında “Arsenal”ı məğlub etməsindən sonra polis 400-dən çox şəxsi həbs etmişdi.