Azərbaycan Cüdo Federasiyası mayın 1-3 aralığında Tacikistanın paytaxtı Düşənbə şəhərində keçiriləcək nüfuzlu “Böyük Dəbilqə” turniri üçün milli komandanın heyətini açıqlayıb. Dünya reytinq xalları uğrunda mübarizə aparacaq “millinin” heyətində həm gənc istedadlar, həm də təcrübəli ağırçəkili idmançılar yer alıb.

Turnirdə ölkəmizi 4 çəki dərəcəsində 6 cüdoçu təmsil edəcək: Murad Muradlı (60 kq), Nizami İmranov (66 kq), İslam Rəhimov (66 kq), Rəşid Məmmədəliyev (73 kq), Uşanqi Kokauri (+100 kq), Camal Qamzatxanov (+100).

Bu heyətdə xüsusilə 66 kq və ağır çəki (+100 kq) dərəcələrində daxili rəqabətin kəskinliyi diqqət çəkir. Federasiya hər iki çəkidə iki idmançıya şans verməklə Olimpiada öncəsi reytinq xallarını maksimuma çatdırmağı hədəfləyir.

Düşənbə turniri cüdoçularımız üçün həm fiziki hazırlıq səviyyəsini yoxlamaq, həm də beynəlxalq arenada mövqelərini möhkəmləndirmək baxımından mühüm sınaq hesab olunur.

Xatırladaq ki, ‘Böyük Dəbilqə’ seriyası dünyanın ən nüfuzlu yarışlarından biri hesab olunur və burada qazanılan hər bir qələbə idmançıların dünya reytinqində irəliləməsinə birbaşa təsir göstərir.