Yeni mövsümdə ölkəmizi basketbol üzrə Çempionlar Liqasının (ÇL) iki klub təmsil edəcək.
Ölkə çempionu “Sabah” mübarizəyə birbaşa əsas mərhələdən qoşulacaq. Turnirdəki digər təmsilçimiz – adını dəyişərək “Landau Layons” (keçmiş “Abşeron Layons”) olan klub isə qüvvəsini təsnifat mərhələsində sınayacaq.
“Landau Layons” təsnifat mərhələsini keçə bilməsə, yoluna Avropa Kubokunun (FIBA Europe Cup) qrup mərhələsində davam edəcək.
Yeni mövsümün təqvimi artıq bəllidir. Turnirin püşkatma mərasimi iyulun 8-də keçiriləcək. Sentyabrın 14-dən 20-dək reallaşacaq təsnifat mərhələsinin ardından, oktyabrın 6-da əsas mərhələnin görüşlərinə start veriləcək.
Xatırladaq ki, son mövsümündə qrup mərhələsində debüt edən ölkə çempionu “Sabah” keçirdiyi 6 qarşılaşmada hesabına yalnız 1 qələbə yaza bilmişdi.