DÇ-2026-da Cənubi Afrika millisinə tarixi uğur qazandıraraq komandanı qrup mərhələsindən növbəti mərhələyə yüksəldən Hüqo Broosun (Hugo Broos) gələcək karyerası ətrafında ziddiyyətli məqamlar yaşanır. Belçikanın “Voetbalnieuws” nəşrinin təcrübəli mütəxəssisin karyerasını bitirməsi ilə bağlı yaydığı müsahibə futbol ictimaiyyətində böyük rezonans doğurub.

Həmin müsahibədə Broosun: “Yoldaşım məşqçilik karyerama son qoyduğuma görə çox şaddır” – deməsi onun mütləq ayrılacağı təəssüratını yaratmışdı.

Lakin çox keçmədən Cənubi Afrika Futbol Assosiasiyası (SAFA) rəsmi bəyanat yayaraq hadisələrin axarını tamamilə dəyişib. Qurumun rəsmi saytında yer alan açıqlamada belçikalı mütəxəssisin vəzifəsində qaldığı vurğulanıb.

Beş ildir “Bafana Bafana”ya rəhbərlik edən Hüqo Broos ölkə futbolunda mütləq rekorda imza atıb. Cənubi Afrika yığmasının tarixində indiyə qədər heç bir çalışdırıcı postunda bu qədər uzun müddət qala bilməyib. SAFA-nın məlumatına görə, 74 yaşlı belçikalı çalışdırıcı hazırda doğma vətənində istirahətdədir və bu ayın sonunda növbəti planları müzakirə etmək üçün yenidən Cənubi Afrikaya dönəcək.