Braziliya A Seriyasında çıxış edən “İnternasional”ın 22 yaşlı mərkəz müdafiəçisi Viktor Qabriel idman hüququnda nadir rast gəlinən cəza ilə üzləşib.
Gənc futbolçu ötən həftə “Kruzeyro” ilə qarşılaşmada qırmızı vərəqə alarkən rəqib oyunçu Qabriel Pekə etdiyi sərt müdaxilə nəticəsində onun baldır sümüyünün sınmasına səbəb olub. Hadisəni araşdıran Braziliyanın İdman Ədaləti Ali Məhkəməsi qeyri-adi qərar qəbul edib.
Məhkəmənin qərarına əsasən, Viktor Qabriel maksimum altı ay müddətinə futboldan kənarlaşdırılıb. Bununla belə, diskvalifikasiyanın müddəti zədələnən futbolçunun bərpa prosesindən asılı olacaq. Qabriel Pek gözləniləndən tez sağalaraq məşqlərə və oyunlara qayıdarsa, müdafiəçinin cəzası da avtomatik olaraq qüvvədən düşəcək. Qeyd edək ki, Braziliya idman qanunvericiliyi rəqibin sağlamlığı üçün ciddi təhlükə yaradan və ağır zədə ilə nəticələnən kobud müdaxilələrə görə belə xüsusi sanksiyaların tətbiqinə imkan verir.