Beynəlxalq Olimpiya Komitəsinin (BOK) Lozannada keçirilən 146-cı sessiyasında tarixi qərar qəbul edilib. Olimpiya hərəkatı tarixində ilk dəfə olaraq, oyunlarda iştirak edən hər bir idmançıya 10 min ABŞ dolları məbləğində “Gələcək naminə hazırlıq” qrantı veriləcək.

Bu təşəbbüs idmançıların uzunmüddətli karyera yüksəlişini və idmandan sonrakı keçid dövrünü dəstəkləmək məqsədi daşıyır.

“Milan-Kortina 2026” Qış Olimpiya Oyunlarından etibarən qüvvəyə minəcək bu layihədən “Aa” akkreditasiyasına sahib olan, həmçinin antidopinq və etika qaydalarını pozmayan bütün idmançılar yararlana biləcəklər. Burada idmançıların qazandıqları nəticə heç bir rol oynamır.  Yəni vəsait yalnız medalçılara deyil, performansından asılı olmayaraq bütün olimpiyaçılara şamil edilir. Təşkilatçılar vurğulayırlar ki, bu ödəniş klassik mənada bir mükafat pulu deyil, idmançıların Olimpiya zirvəsinə ucalmaq üçün illərlə göstərdiyi fədakarlığa və çəkdiyi zəhmətə verilən rəsmi dəyərdir.

Könüllülük prinsipinə əsaslanan proqramda hər hansı bir idmançı qrantdan imtina edərsə, onun üçün ayrılan vəsait batmayacaq, gələcək olimpiyaçıların inkişaf fonduna köçürüləcək. Maliyyələşmə prosesi birbaşa Milli Olimpiya Komitələri (MOK) vasitəsilə həyata keçiriləcək. Eyni zamanda, bu yeni fond BOK-un beynəlxalq federasiyalara və digər idman strukturlarına göstərdiyi mövcud maliyyə dəstəyinə heç bir təsir göstərməyəcək və onun azaldılmasına səbəb olmayacaq.

BOK Atletlər Komitəsinin sədri Paulo Qasol da mövzu ilə bağlı açıqlamasında bu məqama xüsusi toxunub: “Bu qrant idmançıların olimpiya zirvəsinə ucalmaq üçün göstərdiyi zəhmət və öhdəliyin rəsmi etirafıdır. Məqsədimiz hər bir olimpiyaçının bu böyük ailənin bir parçası olduğunu hiss etməsidir”.

BOK hazırda müraciət və icra mexanizmi üzərində işləyir. “Milan-Kortina 2026” oyunları üçün müraciət proseduru bu ilin sonunda başlayacaq, ilk ödənişlərin isə 2027-ci ildə edilməsi planlaşdırılır. Hər Olimpiya Oyunlarında təxminən 14 min idmançının bu proqramdan yararlanacağı gözlənilir.