A Seriyasında 34-cü turun açılış matçı eyni anda iki komandanın elitadan düşməsini rəsmiləşdirib. Cümə axşamı “Piza”nın öz evində “Leççe”yə 1:2 hesablı məğlubiyyəti, komandanın A Seriyası ilə vidalaşmasını rəsmiləşdirdi. Bu oyun həm də turnir taleyi baxımından “bir güllə ilə iki dovşan” effekti yaratdı: “Piza” ilə yanaşı, onun cədvəl qonşusu da rəsmən aşağı diviziona yuvarlandı.

 30 illik fasilədən sonra elitaya qayıdış “Piza” üçün uğursuz alındı. 34-cü tura sonuncu pillədə (18 xal) daxil olan Oskar Hilyemarkın kollektivi üçün mövsümün sonu erkən gəldi. Liqada qalmaq üçün ardıcıl qələbələrə möhtac olan komandanın ümidləri reallığın divarına çırpıldı.

Qarşılaşmanın taleyi fasilədən sonra vurulan qollarla həll olundu. Lamek Bandanın qoluna Mehdi Leris cavab versə də, Valid Çeddiranın dəqiq zərbəsi “Leççe”nin çətin səfərdən qələbə ilə dönməsini təmin etdi. Meydan sahibləri isə ardıcıl 6-cı uğursuzluqdan sonra rəsmən A Seriyası ilə vidalaşmalı oldular.

“Leççe”nin bu zəfəri “Kremoneze” ilə fərqi 4 xala çıxarmaqla yanaşı, həm də “Piza” və “Verona”nın taleyini bir gecədə həll etdi. Cədvəlin alt qatındakı rəqiblərinin qələbəsi hələ meydana çıxmayan “Verona”nı da elitadan sildi. Cəmi bir oyunun nəticəsi həm Toskana təmsilçisinin, həm də veronalıların A Seriyası ilə vidalaşmasını rəsmiləşdirdi.