Avropanın ən nüfuzlu klub turniri olan Çempionlar Liqasında yarımfinalçıların adlarına aydınlıq gəlir. Aprelin 14-ü futbolsevərlər üçün sıradan bir təqvim günü deyil – bu, “ya tamam, ya davam” gecəsidir. İlk oyunlarda 2 cavabsız qolla məğlub olan “Barselona” və “Liverpul” möcüzə reallaşdırmaq üçün meydana çıxacaq.
Metropolitano cəhənnəmində kritik sınaq
Matçın İntriqası və əsas məqamlar
“Barsa” uçurumun kənarında: “Kamp Nou”dakı ilk oyunda Pau Kubarsinin erkən qırmızı vərəqə alması planları pozdu. Xulian Alvaresin möhtəşəm cərimə zərbəsi və Aleksander Sörlotun qolu “Atletiko”ya böyük üstünlük qazandırıb.
Geri dönüş inamı: Kataloniyalılar təslim olmaq niyyətində deyil. Baş məşqçi Hansi Flik inamlıdır: “Bizə möcüzə lazım deyil. Sadəcə ən yaxşı futbolumuzu nümayiş etdirməliyik”.
Müdafiəçi Ronald Arauxo isə əmindir: “Bunu kimsə edə bilərsə, o da bizik”.
Kadr vəziyyəti və forma: “Barselona” həftəsonu “Espanyol”la derbidə inamlı (4:1) qələbə qazanıb. Zədədən dönən Frenki de Yonqun formaya düşməsi komandaya əlavə güc qatır. Dieqo Simeone isə cavab matçı öncəsi ulduzlarını dincəltmək üçün həftəsonu “Sevilya”ya qarşı ehtiyat heyətlə meydana çıxmışdı.
Simeonenin hədəfi: “Atletiko” 2017-ci ildən bəri ilk dəfə Çempionlar Liqasının yarımfinalına vəsiqə qazanmağa yaxındır.
“Enfild” ruhu PSJ-ni dayandıra biləcəkmi?
Matçın İntriqası və əsas məqamlar
Çempion “Enfild” cəhənnəmində: Son çempion PSJ səfərə böyük üstünlüklə yollanır. Lakin Parisdə fərqlənən Xviça Kvaratsxeliya xəbərdarlıq edir: “Diqqətimizi toplamalıyıq, “Enfild“də atmosfer inanılmaz olacaq”.
PSJ-nin “İngilis sindromu” (müsbət mənada): Luis Enrikenin yetirmələri ingilis klublarına qarşı oynamağı sevir. Ötən mövsüm kuboka gedən yolda “Liverpul”, “Aston Villa” və “Arsenal”ı mübarizədən kənarlaşdıran parislilər, bu mövsümün 1/8 finalında London “Çelsi”sini də inamla (5:2, 3:0) məğlub ediblər.
Qol zəmanəti: Statistika hücum futbolu vəd edir. “Liverpul”un UEFA turnirlərində Fransa komandalarına qarşı keçirdiyi əvvəlki 37 oyunun heç biri qolsuz (0:0) bərabərliklə başa çatmayıb.
Kapitanın çağırışı: Vircil van Deyk “Liverpul” azarkeşlərinə ümid verir: “Sona qədər vəziyyəti dəyişə biləcəyimizə inanmalıyıq. Bunun üçün bizdən müstəsna oyun tələb olunacaq”.
Kəsəsi, hansı komandanın növbəti mərhələyə yüksələcəyini proqnozlaşdırmaq çətindir. “Atletiko”nun sarsılmaz müdafiəsi, yoxsa “Barselona”nın hücum xətti? PSJ-nin ulduzlarla dolu heyəti, yoxsa “Anfild”in məşhur ruhu? Cavabı bu axşam yaşıl meydanlarda tapacağıq.
Çempionlar liqası. 1/4 final, cavab oyunları
23:00 Atletiko (İspaniya) – Barselona (İspaniya) (ilk oyun 2:0)
CBC Sport
23:00 Liverpul (İngiltərə) – PSJ (Fransa) (0:2) İctimai TV