Bakıda növbəti mötəbər boks turniri — “IBA Çempionlar Gecəsi” (IBA Champions’ Night) baş tutub. Gərgin idman mübarizəsi şəraitində keçən turnir çərçivəsində ümumilikdə 6 döyüş baş tutub və onlardan 5-də ölkəmizin boksçuları rinqə çıxıb.

Gecənin diqqətçəkən qarşılaşmalarında boksçularımız yaddaqalan nəticələrə imza atıblar. 47,6 kq çəki dərəcəsində çıxış edən dünya çempionumuz Sübhan Məmmədov filippinli rəqibi Riçard Qardlı (Richard Garde) məğlub edərək rəşadətli qələbə qazanıb. Digər təmsilçilərimizdən Sərxan Əliyev (70 kq) Qazaxıstan idmançısı Nurtas Ajbenovu üstələdiyi halda, Seyidcəmşid Cəfərov (72,6 kq) Belarus boksçusu Nikolay Veselov üzərində inamlı qələbəyə sevinib. Turnir çərçivəsində gərgin keçən digər iki döyüş isə bərabərliklə başa çatıb; belə ki, Tayfur Əliyev (60 kq) özbəkistanlı Xurşidbek Rasuljonovla, Nəbi İsgəndərov (70 kq) isə rusiyalı Hikmət Qarayevlə görüşdə sülhə razılaşıb.

Turnirin ən yaddaqalan anlarından biri isə dünya boksunda əfsanəyə çevrilmiş amerikalı Roy Consun (Roy Jones Jr.) Sübhan Məmmədovu rinqə müşayiət etməsi olub. Dünya ulduzunun bu dəstəyi gecəyə xüsusi rəng qatıb.

Xatırladaq ki, Bakıda bundan əvvəl 2024-cü ildə də möhtəşəm “IBA Çempionlar Gecəsi”nə ev sahibliyi etmişdi.