Premyer Liqanın 21-ci turu çərçivəsində Qubada baş tutan “İmişli” – “Şamaxı” qarşılaşması (0:0) hər iki tərəf üçün fərqli hisslərlə yadda qalıb. Meydan sahiblərinin baş məşqçisi itirilən 2 xala görə heyfislənsə də, qonaqların çalışdırıcısı müdafiədəki stabilliyi müsbət hal kimi dəyərləndirib.
“Şamaxı”nın baş məşqçisi Ayxan Abbasov matçdan sonra verdiyi açıqlamada komandasının intizamlı oyunundan razı qaldığını bildirib: “Oyunun çətin keçəcəyini bilirdik. Hesab edirəm ki, hər iki komanda bir xala layiq idi. Bizi sevindirən əsas məqam ardıcıl iki matçdır ki, qapımızı toxunulmaz saxlamağımızdır. Əvvəlki bir çox qarşılaşmalarda çox ‘ucuz’ qollar buraxırdıq. İndi isə bu səhvləri minimuma endirmişik və eyni ruhda davam etmək niyyətindəyik”.
Abbasov qarşıdakı təqvimə də toxunaraq, mübarizənin daha da gərginləşəcəyini vurğulayıb: “İkinci dövrənin başa çatmasına cəmi bir oyun qalıb. Bizi qarşıda kritik üçüncü dövrə və Kubok matçları gözləyir. Bu gərgin qrafikə hazır olmağa çalışacağıq”.