Honkonqda rapid və blits üzrə klublararası dünya çempionatı davam edir. İyunun 21-nə qədər davam edəcək turnirdə ölkəmizi “Odlar Yurdu” komandası təmsil edir. Heyətində Rauf Məmmədov, Aydın Süleymanlı, Əhməd Əhmədzadə, Xəzər Babazadə, Vüqar Manafov, Günay Məmmədzadə və Murad Həşimovun yer aldığı kollektiv rapid yarışlarını başa vurub.

Yarışın üçüncü günündə keçirilən son 4 turda “Odlar Yurdu” “Chess Thulir” (2:4) və “Chessgurukul” (1:5) klublarına uduzsa da, “WR Chess” (3,5:2,5) və “KazChess” (3,5:2,5) üzərində qələbə qazanıb. “WR Chess” ilə matçda birinci lövhədə oynayan Aydın Süleymanlı eks-dünya çempionu və dünya reytinqinin lideri Maqnus Karlseni məğlub edərək turnirin ən böyük sürprizinə imza atıb. 12 turun yekununda 15 xal toplayan “Odlar Yurdu” rapid mərhələsini 11-ci pillədə başa vurub.

Digər şahmatçımız Şəhriyar Məmmədyarov isə Qazaxıstanın “KazChess” klubunun heyətində mübarizə aparır. Onun komandası 12 turdan sonra 13 xalla 7-ci yerdə qərarlaşıb.

Qeyd edək ki, ümumilikdə 48 komandanın yarışdığı mundialın ümumi mükafat fondu 500 000 avrodur. Rapid yarışlarından sonra komandalar blits üzrə qalibi müəyyənləşdirəcəklər.