“El Klasiko”dan bir neçə saat əvvəl “Barselona” düşərgəsindən ağır xəbər gəlib. Klubun yaydığı rəsmi bəyanatda baş məşqçi Hansi Flikin atasının vəfat etdiyi bildirilib. Şəxsi faciəsinə baxmayaraq, alman mütəxəssis bazar günü komandanı meydana çıxarıb və oyunsonrası mətbuat konfransında bəzi məqamlara aydınlıq gətirib.

Təcrübəli mütəxəssis həmin an keçirdiyi hissləri bu sözlərlə ifadə edib: “Bu gün səhər anam zəng vurub atasız qaldığımı deyəndə bir anlıq tərəddüd etdim: bunu gizlətməliydim, yoxsa komandaya danışmalı? Bu kollektiv mənim ailəm kimidir, ona görə də onlarla paylaşmağa qərar verdim. Futbolçuların mənə verdiyi dəstək inanılmaz idi. Bu anı heç vaxt unutmayacağam”.

Flik əldə edilən çempionluq qələbəsini mərhum atasının xatirəsinə həsr etdiyini vurğulayıb. Kataloniya təmsilçisi ilə müqaviləsinin bitməsinə hələ bir il qalan Flik gələcək planlarından da söz açıb. “Barselona”da xoşbəxt olduğunu gizlətməyən məşqçi gələn mövsüm üçün hədəflərini böyüdüb: “Bu fantastik klubda işləmək mənim üçün böyük zövqdür. Özümü doğru yerdə hiss edirəm. Amma bununla kifayətlənməyəcəyik, gələn mövsüm əsas hədəfimiz Çempionlar Liqasını qazanmaqdır”.

Xatırladaq ki, “Barselona” çempionluğu vaxtından əvvəl rəsmiləşdirsə də, mövsümün sonuna daha üç oyun qalıb. Flik hər bir qarşılaşmada sona qədər mübarizə aparacaqlarına və azarkeşləri sevindirməyə davam edəcəklərinə söz verib.