AFFA İntizam Komitəsinin növbəti iclası keçirilib. Peşəkar Futbol Liqasının (PFL) yaydığı məlumata görə, iclasda Azərbaycan Premyer Liqasının və digər aşağı dəstələrin oyunlarında qeydə alınan qayda pozuntuları müzakirə olunub və müvafiq sanksiyalar tətbiq edilib.

İntizam Komitəsinin qərarlarından ən çox “pay” alan klub “Qəbələ” olub. “Qırmızı-qaralar” ümumilikdə 14 500 manat məbləğində cəriməyə məruz qalıb.  Premyer Liqanın 31-ci turunda baş tutan qarşılaşmada “Qəbələ”nin yarımmüdafiəçisi Asif Məmmədov referini təhqir etdiyi üçün birbaşa qırmızı vərəqə alıb. Bu hərəkətə görə klub 10 000 manat cərimələnib, futbolçu özü isə 4 oyunluq diskvalifikasiya edilib. Oyundan sonra meydana kənar şəxslərin daxil olması kluba əlavə 2500 manat itki hesabına başa gəlib. “Qarabağ”la matç zamanı azarkeşlərin meydana kənar əşyalar atması səbəbindən “Qəbələ” daha 2000 manat cərimə ödəməli olacaq.

Digər klublara gəlincə, “Neftçi” ilə oyunda futbolçularının həddindən artıq sarı vərəqə almasına görə “Şamaxı” 700 manat cərimə edilib.

Ölkə kubokunun finalında “Sabah”la qarşılaşmada sarı vərəqə limitini aşmasına görə “Zirə” 700 manat cərimə olunub.

İntizam Komitəsi təkcə əsas komandaların deyil, həmçinin əvəzedici və aşağı liqa təmsilçilərinin fəaliyyətini də nəzərdə qaçırmayıb.  Əvəzedicilər liqasının 25-ci turunda törədilən müxtəlif qayda pozuntularına görə bir sıra Premyer Liqa klublarının ikinci komandaları ümumilikdə 1890 manat cərimələnib.  II liqanın 26-cı turun oyunlarında qeydə alınan neqativ hallara görə klublara üst-üstə 2330 manat məbləğində sanksiya tətbiq olunub.