Basketbol üzrə Azərbaycanın U-20 milli komandasının baş məşqçisi Anar Sarıyev Avropa çempionatının B divizionunda meydan sahibi Slovakiyaya qalib gəldikləri (72:66) II tur matçını şərh edib.
Təcrübəli mütəxəssis Azərbaycan Basketbol Federasiyasının mətbuat xidmətinə açıqlamasında qələbənin əhəmiyyətini vurğulayıb: “İsveçlə ilk oyundan sonra rəqibi tam analiz edə bilmədiyimiz üçün müəyyən çətinliklərlə üzləşmişdik. Artıq qrupda üç oyunun üçündə də qələbə qazanan İsveç nə qədər güclü kollektiv olduğunu göstərdi. Lakin Slovakiya ilə matçda uşaqlar əsl əzm, gözəl basketbol və vətən sevgisi nümayiş etdirərək layiq olduqları qələbəni qazandılar.
Milli komandamızın bütün üzvlərini təbrik edirəm. Bu, komandamız üçün çox böyük və tarixi bir qələbədir. Növbəti qarşılaşmalarda da uğurlu nəticələrlə azarkeşlərimizi sevindirməyə çalışacağıq”.