DÇ-2026-nın pley-off mərhələsinin ilk böyük sensasiyası baş verdi. Onsuz da son 12 il ərzində dünya çempionatlarının pley-off mərhələsinə çıxa bilməməsi ilə hamını təəccübləndirən Almaniya bu dəfə elə ilk mərhələdəcə büdrədi.
Almaniya millisi matçın böyük hissəsində tam üstünlüyə malik idi. Komanda həm topa, həm də meydanın əksər hissəsinə tam nəzarət edir, rəqib cərimə meydançası ətrafında fasiləsiz hücumlar qururdu. Lakin Paraqvay səbirli və diqqətli müdafiə olunaraq nadir əks-hücum imkanlarını gözləyirdi. İlk hissədə belə fürsətlərdən birini dəyərləndirən Ensiso hesabı açdı. Almaniyanın güclü təzyiqinə baxmayaraq, Paraqvay fasiləyə üstün vəziyyətdə yollandı.
İkinci hissədə isə almanlar Havertsin qolu ilə hesabı bərabərləşdirə bildilər. Oyunun gedişinə baxanda elə görünürdü ki, onlar rəqibi sonda mütləq məğlub edəcəklər. Almaniya hətta ikinci qolu da vurdu, lakin VAR qapıçıya qarşı qayda pozuntusu müəyyən etdiyi üçün qolu ləğv etdi.
Əlavə vaxtda da oyunun mənzərəsi ciddi dəyişmədi. Paraqvay sadəcə müdafiə olunur, bəzən böyük çətinliklə topu təhlükəli zonadan uzaqlaşdırırdı. Almaniya isə hücum etsə də, real qol epizodları yarada bilmirdi.
Beləliklə, qalibi penaltilər seriyası müəyyənləşdirdi. Hər iki komandanın oyunçuları bir dəfə səhvə yol versələr də, Paraqvay millisinin qapıçısı iki zərbəni dəf etdi, Almaniya qapıçısı isə yalnız bir seyv edə bildi. Məhz bu amil həlledici oldu – növbəti mərhələyə Cənubi Amerika təmsilçisi yüksəldi və 1/8 finalda Fransa milli futbol komandası ilə İsveç milli futbol komandası cütünün qalibi ilə qarşılaşacaq.
Dünya Kuboku, 1/16 final
Almaniya – Paraqvay 1:1, penaltilərlə 3:4
Foksboro. “Cillet Stedium”. 63945 tamaşaçı.
Hakim: Calal Cayed (Mərakeş)
Almaniya: Noyer, Kimmix, Rüdiger (Tşau, 110), Ta, Braun, Pavloviç (Anton, 79), Nmeça (Qoretska, 46), Sane (Voltemade, 88), Undav (Musiala, 63), Virts (Amiri, 110), Haverts.
Paraqvay: Hil, Kaseres (Oheda, 99), Qustavo Qomes, Kanale, Xunior Alonso (Balbuena, 120+2), Kubas, Almiron (Velaskes, 91), Bobadilya (Sanabria, 99), Qalarsa, Ensiso (Maurisio, 57), Avalos (Kabalyero, 55).
Sarı vərəqələr: Kubas, 65. Haverts, 106. Musiala, 115. Qalarsa, 118.
Penaltilər: Haverts – 0:0 (qapıçı)
Maurisio – 0:1
Kimmix – 1:1
Qustavo Qomes – 1:2
Musiala – 2:2
Qalarsa – 2:3
Voltemade – 2:3 (qapıçı)
Sanabria – 2:3 (yan)
Amiri – 3:3
Balbuena – 3:3 (qapıçı)
Ta – 3:3 (yan)
Kanale – 3:4