Premyer Liqasının XXIV turunda səfərdə “Sumqayıt”ı minimal hesabla (1:0) məğlub edən “Şamaxı”nın baş məşqçisi Ayxan Abbasov qarşılaşmadan sonra media mənsublarının suallarını cavablandırıb. Təcrübəli mütəxəssis komandasının cari forması, klub daxili problemlər və transfer məsələləri ilə bağlı maraqlı açıqlamalar verib.
Qələbəni şərh edən Abbasov, komandasının yüksəlişdə olduğunu vurğulayıb:“Maraqlı oyun izlədik. Məqsədimiz turnir cədvəlində bizdən öndə olan rəqiblərə çatmaqdır. Bu baxımdan çox vacib üç xal qazandıq. Hazırda kifayət qədər döyüşkən heyətimiz var. Əgər bəzi oyunlarda lazımsız xal itkiləri yaşamasaydıq, indi daha yuxarı pillələrdə qərarlaşa bilərdik. Yaxın vaxtlarda çempionatda fasilə yaranacaq. Yorğunluq olsa da, komanda yaxşı ritm tutub və biz bu tempdə davam etmək istərdik. Son dövrlər yalnız «Qarabağ»a uduzmuşuq, bu da artan dinamikadan xəbər verir”.
Baş məşqçi yerli mütəxəssislərin üzləşdiyi çətinliklərə və futbol camiəsindəki bəzi neqativ hallara da toxunub: “Biz özümüzünkülərə dəstək olmalıyıq. Bəzi tanınmış məşqçilərin yerli mütəxəssisləri tənqid edərək onların yerini tutmaq istədiyini görürəm. Nə vaxt ki, öz kadrlarımıza qiymət verəcəyik, o zaman klub rəhbərləri də bizə dəstək olacaq. Təəssüf ki, hazırda rəhbərlərin 90 faizi bu yanaşmada deyil. Nəticə verməyən bir çox funksionerlər vəzifələrindən getməlidir. Problemi yalnız məşqçidə axtarmaq düzgün deyil, rəhbərlikdən də soruşulmalı çox məqam var”.
Komandanın bombardiri Rossi haqqında danışan mütəxəssis, onun komandada qalmasının maliyyə məsələlərinə bağlı olduğunu qeyd edib: “Rossi bura gələndə fərqli idi, üzərində çox çalışdı və hazırda 9 qolla komandaya böyük xeyir verir. Liqada 400-500 min maaş alıb, mövsüm boyu 2 qol vura bilməyən legionerlər var. Onun müqaviləsi yayda başa çatır və belə bir oyunçunu heyətdə saxlamaq asan olmayacaq. Hər şey büdcədən asılıdır. Klub inkişaf etməlidir”.
Sonda Ayxan Abbasov şəxsi karyerası ilə bağlı gözlənilməz anons verərək, “yeri gəlmişkən, yaydan etibarən yeni bir yerdə fəaliyyətə başlayacağam” sözləri ilə mətbuat konfransını yekunlaşdırıb.