Barselona”nın prezidenti Joan Laporta və komandanın keçmiş sükançısı Xavi Ernandes arasındakı gərginlik yeni mərhələyə qədəm qoyub. Tərəflərin mətbuat vasitəsilə bir-birinə ünvanladığı açıqlamalar, ayrılığın pərdəarxası məqamlarını və uğursuz qalan transfer cəhdlərini gün işığına çıxarıb.
Xavi Ernandes istefası ilə bağlı danışarkən Joan Laportanı səmimiyyətsizlikdə ittiham edib. Onun sözlərinə görə, prezident şəxsi şam yeməyində onu klubda qalmağa razı salıb: “Laporta mənə belə demişdi: “Xavi, sənsiz nə bu komandanı, nə yeni “Kamp Nou”nun açılışını, nə də klubun 125 illiyini təsəvvür edə bilmirəm”. Bu vədlər məni ruhlandırdı və qalmağa qərar verdim. Lakin sonradan anladım ki, o, mənə həqiqəti deməyib”.
Buna cavab olaraq Joan Laporta “BarcaTimes”a açıqlamasında fərqli bir mənzərə yaradıb. Prezidentin sözlərinə görə, ayrılığa səbəb Xavinin ruh düşkünlüyü və heyətlə bağlı qərarları olub. Laporta iddia edir ki, Xavi məşqçiliklə ailə həyatını tam uzlaşdıra bilmirdi və artıq “tükənmişdi”. Xavinin “Barselona”nın yaxın iki ildə “Real” və Avropa nəhəngləri ilə rəqabət aparmaq gücündə deyil” deməsi rəhbərliyin səbrini daşırıb. Prezident bildirib ki, Xavi əvvəlcə dediyi sözlərin “səhv anlaşıldığını” bildirsə də, bir neçə gün sonra heyətdə kəskin dəyişikliklər tələb edib və bu, son nöqtə olub.
Digər bir qalmaqallı məqam isə Lionel Messinin 2023-cü ildə klubun qapısından dönməsi ilə bağlıdır. Xavi bu prosesdə Laportanın son anda transferdən imtina etdiyini bildirsə də, prezident hadisələrin tam fərqli cərəyan etdiyini deyir:
“2023-cü ilin martında Xavi yanıma gəlib Messinin qayıtmaq istədiyini dedi və məndən müqavilə hazırlamağımı xahiş etdi. Lakin may ayında atası Xorxe Messi mənə bildirdi ki, oğlu “İnter Mayami”ni seçib. Mən bu qərara hörmətlə yanaşdım”.
Xavi Ernandesin 2024-cü ilin mayında rəsmən yola salınmasından sonra “Barselona”da yeni dövr başlayıb. Hazırda komandaya almaniyalı mütəxəssis Hans-Diter Flik rəhbərlik edir. Laporta və Xavi arasındakı bu açıq qarşıdurma isə klubun daxilindəki idarəetmə böhranının hələ də tam soyumadığını göstərir.