Premyer Liqanın 20-ci turu çərçivəsində baş tutan “Araz-Naxçıvan” – “Sumqayıt” (1:0) matçından sonra hər iki komandanın baş məşqçisi mətbuat konfransında oyunun nəticəsini dəyərləndirib.

Andrey Demçenko: “Futbolçularım qələbə üçün vuruşdular”

“Araz-Naxçıvan”ın baş məşqçisi Andrey Demçenko qazanılan 3 xalın əhəmiyyətini vurğulayaraq, komandasının əzmkarlığından razı qaldığını bildirib: “Yaxşı oyun nümayiş etdirərək istədiyimiz 3 xalı qazandıq. Futbolçularım meydanda sona qədər vuruşdular və qələbə üçün hər şeyi etdilər. Komandada gördüyümüz istək və motivasiya bizi sevindirir. Hazırda sistemimiz üzərində işləyirik, öyrənilməli olan bəzi nüanslar var, lakin oyunçuların özlərinə inamı tam bərpa olunub”.

Saşa İliç: “Məğlubiyyətə layiq deyildik”

“Sumqayıt”ın sükanı arxasındakı Saşa İliç isə nəticənin oyunun gedişatına uyğun olmadığını qeyd edib. O, komandasının uduzmalı olmadığını müdafiə edib: “Bu gün uduzmalı deyildik. Penalti qolu ilə məğlub olduq, halbuki meydanda bərabərsəviyyəli mübarizə gedirdi. “Zirə” ilə oyunların bu nəticəyə təsir etdiyini düşünmürəm”.

Serbiyalı mütəxəssis yeni transfer Sedrik Badolo haqqında da danışıb: “Badolo cəmi bir məşqə çıxıb. Heyətin gücləndirilməsinə ehtiyac olsa da, artıq transfer pəncərəsi bağlanıb və mövcud heyətlə davam edəcəyik”.İliç son vaxtlar daha az gülümsəməsi ilə bağlı suala konkret cavab verib: “Mən hər zaman pozitivəm. Lakin uduzan komandanın baş məşqçisinin sevinməsi doğru olmazdı. Əsas odur ki, futbolçular keyfiyyətli oyun göstərsinlər”.