FİFA rəhbərliyi 2026-cı il Dünya Çempionatında yarımavtomat ofsayd müəyyənetmə sistemini daha da təkmilləşdirmək niyyətindədir.
BBC Sport-un məlumatına görə, FİFA ofsayd sisteminin həm dəqiqliyini, həm də vizual keyfiyyətini artırmaq məqsədilə DÇ-2026-da iştirak edəcək hər bir futbolçunun rəqəmsal 3D skanını həyata keçirməyi planlaşdırır.
Bu prosedur 48 milli komandanın bütün üzvlərini, yəni ümumilikdə 1248 futbolçunu əhatə edəcək. Turniröncəsi rəsmi fotosessiyalar zamanı futbolçular skan üçün nəzərdə tutulmuş xüsusi kameraya daxil olacaqlar. Skanlama prosesi bir saniyədən də az vaxt aparacaq.
FİFA nümayəndələri bildiriblər ki, bu üsul ofsayd qərarlarının verilməsi zamanı bədən hissələrinin ölçülərini maksimum dəqiqliklə qeydə almağa imkan verəcək.