“Qarabağ”ın Gempionlar Liqasının əsas mərhələsindəki, növbəti rəqibi “Ayaks” erediviziyanın 15-ci turunda səfərdə “Fortuna” ilə qarşılaşıb. İlk qol meydan sahiblərindən gəlsə də, birinci hissənin uzatma dəqiqəsində “yəhudilər” hesabı bərabərləşdirə biliblər. Düzdür, yenə qola “Fortuna”nın oyunçusu imza atıb, ancaq topu bu dəfə rəqibin yox, öz qapısına.

İkinci yarının əvvəlində yenidən meydan sahibləri amsterdamlıların köməyinə gəlib. Belə ki, yenə topu öz qapılarına göndərməklə “Ayaks”ı hesabda irəli çıxarıblar. Oyunda sonuncu qolu bu dəfə “Fortuna” yox, “Ayaks”ın sol cinah mudafəçisi Ouen Veyndal vurub. Beləliklə, “yəhudilər” rəqibin sayəsində qələbə qazanıblar – 3:1.

Ağdam klubun digər rəqibi “Liverpul” isə “Lids”lə oyunda 2:0 irəlidə olsa da, uzatma dəqiqələrində qələbəni əldən verib – 3:3. Bu qarşlaşma mersisaydlıların müdafiə xəttində boşluqların yetərincə olduğunu bir daha təsdiqlədi.

“Qarabağ”ın rəqibi “Ayntraxt”a gəlincə, artıq klub tərəfdarları  böyük hesablı məğlubiyyətlərə alışdırıb. Belə ki, frankfurtlular hazırda bundesliqada 7-ci pillədə qərarlaşmasına baxmayaraq, ən çox top buraxan komandaların siyahısında birincidir (13 oyna 29 qol). Maraqlıdır ki, “Ayntraxt” ÇL-də bu göstəriciyə (5 oyuna 14 qol buraxıb) görə yalnız “Ayaks”dan (5 oyuna 16 qol buraxıb) geri qalır. Dünən, isə səfərdə “Leyptsiq”lə qarşılaşan frankfurtlular meydanı böyük hesablı məğlubiyyətlə tərk edib – 0:6.