PSJ-nin müdafiəçisi Əşrəf Hakimi Afrikada ilin futbolçusu seçilib. Mərakeşli müdafiəfçi bu mübarizədə “Liverpul”un misirli hücumçusu Məhəmməd Salahı və “Qalatasaray”ın nigeriyalı forvardı Viktor Osimheni geridə qoyub.
Təqdimat mərasimində çıxış edən Hakimi belə deyib: “Bu nüfuzlu mükafatı almaq mənim üçün həqiqətən şərəfdir. Bu mükafat təkcə mənim deyil, Afrikada futbolçu olmaq arzusu ilə yaşayan bütün güclü kişi və qadınlar üçündür. Həm də o kəslərindir ki, onlar uşaqlığımdan mənim peşəkar futbolçu olacağıma inanıblar”.
Mükafatlandırma mərasimi Mərakeşin paytaxtı Rabatda keçirilib. Hakimiyə mükafatı FIFA prezidenti Canni İnfantino və Afrika Futbol Konfederasiyasının (CAF) prezidenti Patris Motsepe təqdim edib. Xatırladaq ki, Hakimi 1973-cü ildə bu titulu qazanan zairli Bvanqa Çimenedən sonra “Qara qitə”nin ən yaxşı oyunçusu seçilən ilk müdafiəçidir.
27 yaşlı Hakimi 2021-ci ilin yayından PSJ-də çıxış edir. Bu müddətə dörd dəfə Fransa çempionatının, üç dəfə Fransa Superkubokunun, iki dəfə Fransa kubokunun və Çempionlar Liqasını qalibi olub. Hakimi həmçinin “İnter”in, Dortmund “Borussiya”sı və “Real”ın formasını geyinib. “Real”ın heyətində Çempionlar Liqasını, Klublararası Dünya Kuboku, UEFA Superkuboku və İspaniya Superkubokunu qazanıb. Müdafiəçi “Borussiya” ilə Almaniya Superkubokunu və “İnter” lə A seriyasının qalibi olub.
Hakimi millində 2016-cı ildə debüt edib. Yığmada 88 oyun keçirib, 11 qol vurub, 15 məhsuldar ötürmə edib və 2024-cü il Olimpiya turnirində bürünc medal qazanıb.
Səudiyyə Ərəbistanı “Əl-Hilal”sinın mərakeşli hücumçusu Qizlan Şebbak ilin ən yaxşı qadın oyunçusu seçilib. Kabo Verde yığmasına tarixində ilk dəfə mundiala vəsiqə qazandıran Bubişta isə ilin ən yaxşı məşqçisi adını qazanıb.
