Bu gün UEFA Konfrans liqasının 3-cü təsnifat mərhələsinin ilk oyunları keçiriləcək. Artıq sensasiyaya bərabər nəticə qazanaraq mərhələ adlayan “Araz-Naxçıvan” “Dalğa Arena”da Kiprin “Omoniya” klubu ilə qarşılaşacaq. Yunan Kiprinin adlı-sanlı klublarından olan “Omoniya” Avropa klub turnirlərində zəngin təcrübəyə malikdir və artıq üç dəfə Azərbaycan klubları ilə qarşılaşıb. 2021-ci ildə Konfrans Liqasında “Qarabağ”dan kötək yeyən kiprlilər (1:4 və 2:2), daha sonra bu məğlubiyyətin acısını “Zirə” (2024/6:0 və 0:1) və “Qəbələ”dən çıxıb (2023/3:2 və 4:1). Hər iki duel Konfrans Liqasında olub. Maraqlıdır ki, həmin oyunlarda “Qəbələ”nin baş məşqçisi indi “Araz-Naxçıvcan”ın sükanı arxasında olan Elmar Baxşıyev olub. Odur ki, Baxşıyev üçün revanş fürsəti ələ düşüb.
21-qat ölkə çempionu olan “Omoniya” “Torpedo Kutaisi”ni keçərək bu mərhələyə gəlib. Komanda özünün mütəşəkkil və intizamlı müdafiəsi ilə seçilir. Xüsusən də Avropa kuboklarında müdafiədə daha intizamlı oynayırlar. Əsasən arxadan sürətli əks-hücumlara üstünlük verirlər. Bu gün axşam da topa nəzarəti “Araz-Naxçıvan”a verib qəfil hücumlarla çıxacaqları istisna deyil. Orta sahədə say çoxluğu ilə oynayan bir komandadır.
“Araz-Naxçıvan” da “Aris”lə oyunlarda yaxşı mənada təəccübləndirdi. Komanda bütün xəttlərdə intizamlı oynamağı bacardığını nümayiş etdirdi. Heyətdəki cüzi itki bu oyun intizamına mane olacaq səviyyədə olmamalıdır. Buna Baxşıyev oyunöncəsi mətbuat konfransında da işarə etdi.
Oyunun hakimi Andrei Berka haqqında ötən günlərdə məlumat vermişdik.
20:00. Araz-Naxçıvan – Omoniya
Baş hakim: Andrei Berka (Çexiya)
Stadion: “Dalğa Arena”.