Premyer Liqanın III turuna yekun vuran qarşılaşmada “Qarabağ” səfərdə “Sumqayıt”ı 1:0 hesabı ilə məğlub edib. Ağdam təmsilçisinə qələbəni Jali Muaddibin ilk hissənin son dəqiqələrində vurduğu penalti qolu gətirib.
Görüşə daha fəal başlayan tərəf “Qarabağ” olub. “Köhən atlar” topa daha çox nəzarət etməklə yanaşı, rəqib müdafiəsini təzyiq altında saxlamağa çalışıb. “Sumqayıt” isə əsasən müdafiədə inamlı oynayaraq əks-hücumlarda təhlükə yaratmağa çalışıb. Qarşılaşmanın gedişində “Qarabağ”ın üstünlüyü statistikalarda da öz əksini tapıb. Qurban Qurbanovun başçılıq etdiyi kollektiv topa nəzarətdə aşkar üstün olub və daha çox hücum təşkil edib.
Ancaq 32-ci dəqiqədə “Qarabağ” çətin vəziyyətə düşüb. Komandanın kapitanı Kadi Borges qırmızı vərəqə ilə meydandan kənarlaşdırılıb və Ağdam təmsilçisi görüşün qalan hissəsini azlıqda keçirməli olub. Say üstünlüyü qazanan “Sumqayıt” isə bu fürsətdən lazımi qədər yararlana bilməyib.
İlk hissənin sonlarında isə “Qarabağ” azlıqda olmasına baxmayaraq hesabı açmağı bacarıb. 45-ci dəqiqədə təyin olunan penaltini Jali Muaddib dəqiq yerinə yetirib. Beləliklə, Ağdam təmsilçisi fasiləyə həm say azlığı, həm də hesab üstünlüyü ilə yollanıb.
İkinci hissədə “Sumqayıt” hesabı bərabərləşdirmək üçün təşəbbüsü ələ almağa çalışsa da, “Qarabağ” müdafiədə intizamlı oyun nümayiş etdirib. Azlıqda qalmasına baxmayaraq, Qurban Qurbanovun komandası minimal üstünlüyünü sonadək qorumağı bacarıb və Sumqayıtdan qələbə ilə dönüb.
“Sumqayıt” – “Qarabağ” 0:1 (0:1)
Qol: Jali Muaddib, 45-pen.
Baş hakim: Fərid Hacıyev.
“Sumqayıt”: Xəyal Fərzullayev, Həccət Haqverdi (k) (Ayxan Süleymanlı, 88), Nihad Əhmədzadə, Nadir Orucov (Tyaqo Almeyda, 60), Jeam, İsa Suliman, Sedrik Badolo, Ronaldo Vaskes (Rüstəm Əhmədzadə, 60), Aleksa Yankoviç (Emil Mustafayev, 76), Lukas Blek, Renan Santana (Keffel, 76).
“Qarabağ”: Mateuş Koxalski, Musa Qurbanlı (Oleksey Kaşşuk, 61), Kadi (k), Mateus Silva, Bruno Lanqa, Çebrail Makretskis, Taofik İsmahil, Jali Muaddib, Pedro Bikalyo, Samuel Lobatu (Marko Yankoviç, 46), Bense Varkonyi.
Qırmızı vərəqə: Kadi, 31 (“Qarabağ”).
Sarı vərəqə: Rüstəm Əhmədzadə (“Sumqayıt”). Stadion: Sumqayıt, “SOCAR Polymer Arena”.